《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年9月19日
日前先講完「凡事都有定期，天下萬物都有定時」。巴塞隆拿會長巴杜美經已面臨彈劾，周四死線前兩萬幾名會員簽名向佢投下不信任票，遠超所需16532票，11月1日前過埋個彈劾，呢位臭名遠播嘅會長就要躝屍趷路。
根據巴塞會章，會方一旦確認兩萬幾票中八成票數有效，就要喺9月29日前成立委員會確認不信任議案，10月10日前決定係咪彈劾巴杜美，彈劾投票必須喺10至20日內完成，超過三分二會員同意嘅話，巴塞就要提前選新會長啦！
有民主無獨裁
民主機制就係咁運作嘅！巴杜美之前仲厚住面皮唔肯提前大選，想話拖到出年3月先決勝負，發你個白日夢啦！呢位厚顏會長真係鑊鑊新鮮鑊鑊金，周四居然又有新醜聞，前教練施迪安發聲明話要控告巴塞不合理解僱。
達聞西日前聽過呢單嘢，當時《馬卡報》話朗奴高文唔可以落場督師，因為施迪安未簽離職協議，按道理仲係巴塞教練！西班牙足總都話未收到前任嘅解僱文件，朗奴高文仲未註冊為球隊教練！咁都得？真係講你都唔信。
呢兩日內情陸續曝光，原來施迪安合約至2022年夏天，點知教咗半年就接大信封，於是提出賠償一年人工，球會梗係唔肯啦！其實施迪安係巴杜美搵嘅，點解搞到要「法庭見」啊？原來係8月17日炒完人，對方9月16日先收到書面聲明，好唔尊重人囉！
其實，巴杜美仲想得罪幾多人呢？仲想點樣粉碎巴塞個招牌呢？民情繼續咁樣翻滾落去，佢都好難捱得過11月。呢個結果呢，對巴塞上下都冇好處，季中換會長軍心點會唔散？朗奴高文失去巴杜美嘅支持，仲點樣服到眾呢？
粉碎巴塞招牌
傾開巴塞講埋蘇亞雷斯嘅近況，佢周四喺佩魯賈參加意大利語考試，結果叻仔過到關兼獲中等成績，攞住張cert就可以去申請護照，好快就可以登陸意甲啦！考試官事後大讚「阿蘇」聰明又友善：「發音清晰、聽力又好，相信會進步神速！」
呢位考官都好鬼馬，臨場考埋「阿蘇」急才：「你估將來會喺邊個城市定居？」呢位球星冇咁易漏口風：「你指都靈？嗱！我冇講過啊！」究竟係咪加盟祖記同C朗合作呢？相信好快有答案。
放大圖片 / 顯示原圖
訂戶登入
