怒火好過慾火

後生仔血氣方剛，難免有嗌霎同推撞，最緊要係識得收，唔好搞到傷感情。21歲阿仙奴新兵尼基迪亞周六賽前，就同大3歲嘅丹尼施巴路斯發生衝突，不過賽後經已笑笑口影selfie，毫無牙齒印。

事發係賽前熱身時段，施巴路斯一次「late-takle」激嬲尼基迪亞，後者一個波省埋對方度，於是開始埋身互推，好彩大隻佬哥拉辛拿斯響附近，一嘢分開二人避免衝突升級。呢場波係英超揭幕戰，未開波就開拖？唔係幾好睇嘅！

阿仙奴最終終大勝富咸3比0，施巴路斯同尼基迪亞分別後備入替，響頭炮兼有份落場，兩條友賽後不知幾老友，施巴路斯仲響社交網站分享selfie：「兄弟！冇問題！」阿仙奴官方社交網站都share咗，仲寫道：「好閒啫！」

賽前開拖賽後合照

講真呀！有人嘅地方就有政治，難免有矛盾同衝突，管理人一定要識得做和事佬，遇着雙方旗鼓相當，或雙方都有唔着嘅，一係大事化小、小事化冇，一係各打五十大板，再擺圍和頭酒就冇事！最棹忌偏幫一邊，結果星星之火足以燎原。

阿仙奴球員近年一係冇火，好似奧斯爾；一係就過晒火位，好似古安杜斯同格列沙加。施巴路斯同基迪亞就唔同啦！連操練都有火不特止，仲識得及時滅火做番好朋友，影埋相放上社交網站，幫球會化解埋公關危機，真係明日之星啊！

曼城新星菲爾科頓同曼聯嘅格連活特就唔同啦！20歲未夠啫，跟國家隊出戰居然慾火焚身，安排幾名冰島美少女上酒店房，仲收買埋酒店職員。根據最新爆料，兩條友仲有吸「笑氣」嘅習慣！位都未正式上到，就咁樣糟蹋自己？

英格蘭班土炮真係要潔身自愛，咪以為脫歐後外援會少咗，就唔怕冇大會踢啊！世界局勢不斷變化緊，今日唔知聽日事，冇咩嘢係實食冇黐牙！唔識自立自強，隨時30歲都未到就要踢細會，史東斯同連格就危危乎啊！

達聞西睇好呢支阿仙奴，皆因領隊阿迪達識政治，好似今次衝突事件，佢就識扮無知：「係咩？我乜都見唔到啊！」係囉，好多嘢唔講好過講，心照不宣啦！

下一篇：	大坂直美再贏美網
上一篇：	輸到起火

文章：