《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年9月3日
達聞西呢一年上多咗Twitter，皆因捕新聞材料實在方便，打關鍵字各國報道以秒計更新；fb就方便搵個人反應，兩邊啲料撈埋搓幾搓，大概見到事態嘅脈絡同未來發展。傳統紙媒識得將資訊分析歸納，再作詳盡分析報道，可謂各有千秋。
fb玩咗10幾年，睇到太多虛偽同投機，為咗呃like乜都肯制，打完卡轉頭就做番自己，堪稱智能手機嘅人格分裂症。好似黑命貴運動同女權運動，勒邦占士等一班明星同藝人喺fb一張臉，面對社會不公又另一張臉，唔怪得俾人話「偽人」啦！
紅魔鬼雙星拉舒福特同雲迪碧克就唔同啦，喺fb講咗嘅嘢絕對有實際行動。雲迪碧克據講會爭取着曼聯34號戰衣，呢個冧巴係阿積士前隊友諾利嘅，佢2017年夏天突然昏迷不醒，到今年3月先識得用眼神交流，雲迪碧克希望借此支持對方咁話。
「福仔」拉舒福特仲巴閉，新冠疫情期間為民寫信，成功爭取政府延長「免費校園飲食券」到暑假，最近再下一城同餐廳超市合作，解決當地兒童嘅飢餓問題。「福仔」22歲仔已經咁有愛心同能力，叻過好多高官多多聲，第日可以考慮下從政喎！
好多能力係迫出嚟，而唔係靠讀書考出嚟嘅。「福仔」細個就係窮小子，爸爸離婚走咗去留低媽咪Melanie，佢番幾份工養3個化骨龍，「有時一日得幾片麵包，倒啲滾水加少少糖，撈下食落肚當一餐！」「福仔」回憶起童年成日都眼濕濕。
社交媒體泛濫
「我到今時今日啊，仲記得媽咪嘅深夜啜泣聲，都唔知聽日落鑊煮啲乜……好彩我叫做識踢波，可以幫到全家人脫貧，但好多家庭冇咁好彩，我哋係咪應該幫下佢哋呢？」「福仔」成日探訪低收入家庭，知道佢哋生活幾艱難，自然真正幫得到手！
所以高官議員好，名人球星都好，唔好再用fb套思維做人同處事。做名人冇公關梗係死得啦！但隨住社交媒體嘅泛濫，已經出現水能載舟亦能覆舟嘅情況。一向畀like你嘅人，幾分鐘後會四川變臉畀嬲你，剎那嘅「心心」真係唔代表永恒。
既然假得提心吊膽，寫段post分享張相都好大壓力，倒不如以真面目示人，或以實際行動代替網上攞彩啦！
放大圖片 / 顯示原圖
訂戶登入
