小心揸車

車仔領隊林柏特花名「林伯」，其實今年先得嗰42歲，前後教咗兩季波啫。上季帶領班後生仔攞到英超第四，行家見到佢都直豎拇指，老闆阿巴莫域治夏天加碼買人，最起碼燒兩億歐羅，睇嚟要爭冠軍咁款。

迪姆華拿5300萬歐羅、芝維爾5000萬歐羅、薛耶治4000萬歐羅，即將加盟嘅夏維斯成8-9000萬歐羅，屈指一算已經過咗兩億；仲有免費加盟嘅巴黎聖日耳門中堅堤亞高施華，人工一定貴到飛起，咩疫情下有財政壓力？啲土豪面子大過天。

錢就燒咗啦，跟住落嚟就睇成績，咁就輪到「林伯」出場啦！呢位少帥之前管治能力好似幾好，畢竟都係教英冠球隊打比郡，上季車仔又遇啱要換血，加上曼聯、熱刺、阿仙奴立立亂先畀車仔跑咗出嚟。

今季就唔可以同日而語啦！尤其係車仔實在有太多新血，好似迪姆華拿同夏維斯兩位德甲球星，究竟可唔可以適應英超嘅體力化打法呢？佢哋後防中路有轉身慢嘅弱點，堤亞高施華係好有經驗，但又有慢吞吞嘅問題。

達聞西想講嘅係，車仔使咗咁多錢，但實力有冇巨大質變呢？呢個開季好值得觀察。就攞身價近億嘅夏維斯嚟講，佢係咪高班過佐真奴費路同尼高路簡迪好多呢？據講，簡迪好可能離隊加盟國際米蘭，騰個位畀呢位德國新星。

車仔中前場人腳強

仲有，上季冒出頭嘅本土中鋒譚美阿巴謙，今季唔通仲可以有正選？咁貴買個迪姆華拿番嚟唔用啊？仲有大後備中鋒基奧特，今季三大中鋒將爭崩頭。車仔中前場幾乎人腳好強，而且個個當打或有進步空間，使咩簽咁多人啊？

好似身價第一嘅門神阿列沙巴拿加咁，經過兩季嘅反反覆覆，證明表現與轉會費不符，「林伯」想換咗佢都好難，試問有邊隊波肯簽？之前傳過用阿列沙巴拿加換馬體會門神奧比歷，到今日都係煲緊無米粥。

林伯呢個情況同公司高層好似，以前風平浪靜就自以為好醒，一遇上疫情同社會動盪，咪畀人睇到原來係個豬頭炳！達聞西希望林伯新球季繼續有好表現，證明自己有駕馭球星嘅能力，上季並唔係一時行運！

下一篇：	日本內戰
上一篇：	一個救全家

文章：