魯營人肉地氈

入屋叫人、入廟拜神、入鄉隨俗，做齊呢三樣移民去邊都受歡迎。不過，入鄉隨俗要睇情況，好似基里巴斯有人肉地氈迎貴賓習俗，唔通真係貪過癮走去踩咩？隨時變公關災難㗎！好簡單，你去到玉林唔通跟住食狗肉？

魯營球場近年都有個傳統，但凡新教練都要見下「美斯神」，呢位小矮人好似四面佛咁靈，佢話你掂你就掂，唔掂都掂。新教練朗奴高文周四中午見過美斯，究竟傾成點呢？

去拜神要有解籤佬，要搵啱人先得。親皇馬嘅《馬卡報》同《阿斯報》呢兩份報章話兩個人傾唔掂，「美斯話走嘅機率大過留低！」於是，英國傳媒捉住呢句大做文章，講到魯營就快末日。

達聞西鍾意睇埋巴塞傳媒，巴塞電台RAC1係有提到美斯有離心，但跟住幾句好緊要，「不過美斯承認留低容易，走係非常之難，因為仲有一年合約。」美斯解約金高達7億幾歐羅，請問邊間球會畀得起？

美斯近日響山區呼吸新鮮空氣，一收到電話就揸車番球會，咁已經證明佢有意留隊，或者有心同最後一年任期嘅巴杜美鬥長命。聽講，呢次同朗奴高文初次見面冇咩成果，不過雙方同意繼續見面，唔掂傾倒掂。

平息球員嘅怒火

會長巴杜美呢劑孤注一擲，炒心腹大臣體育總監艾比度，希望平息美斯等球員嘅怒火。之前達聞西話新任體育總監柏拉尼斯失業多年，後來睇番原來佢一直擔任艾比度私人助理，所以足球網站查唔到佢嘅工作情況。

體育總監呢個位好緊要㗎，巴杜美點解唔搵個猛人坐鎮，反而提拔個助理做總監呢？連日來有關巴塞換血新聞多籮籮，甚至碧基、布斯基斯、佐迪艾巴都要走，然後再聽到米高堅尼、迪比呢類羅致目標，達聞西真係冇眼睇。

不過點都好啦！呢一年係權力更替嘅一年，巴塞呢隊波未必穩重，正所謂舊嘅制度正在崩塌，新嘅制度又未建立。如果巴塞係一隻股票嘅話，達聞西嘅評價係：充滿住不明朗因素，短線難睇好，長線就審慎樂觀。

下一篇：	主要足球賽程
上一篇：	拜仁務實穩重巴黎浪漫輕浮

文章：