重炮手炸親手

性格決定命運，呢句話真係冇錯！好似哥迪奧拿踢波同教波都係思考型，高普係激情澎湃型。巴塞隆拿新教練朗奴高文屬於激動型，脾氣似足招牌右腳重炮，但好多時唔夠冷靜，偶爾仲打高章波添！

好似呢次接手巴塞個爛攤子咁，就反映佢嘅性格弱點啦。主席巴杜美下年就面臨選舉洗禮，近日炒教練施迪安同體育總監艾比度，就係想平息要求提前大選嘅怒火，希望安撫美斯下季打好啲，博連任！

呢個如意算盤好難打響，美斯嘅反對派唔會幫手，暗地裏希望德高望重嘅拉樸達回巢。哥迪奧拿、美斯通通係拉樸達嘅寵兒，沙維更加堅拒回巢執教，因為大家都等巴杜美倒台，再決定下一步點行。

朗奴高文當然好想教巴塞，畢竟佢曾經係魯營隊長，年初拒絕巴塞過一次，想話打埋歐國盃先加盟，後來歐國盃延期一年，巴杜美喺歐聯恥辱性出局後再上門，呢次朗奴高文等唔切啦！賠500萬歐羅都要離開荷蘭隊。

朗奴高文係個獨斷獨行嘅鐵帥，執教華倫西亞逼退過艾比達、安古路、簡尼沙利斯等名宿，結果半年就被炒魷魚。但係今日嘅巴塞要和諧，而唔係鐵腕統治，會方講明叛軍阿頭美斯唔郁得，請問朗奴高文可以有咩作為呢？

戰術方面，朗奴高文唔屬於Tiki-taka嘅時代，而係告魯夫嘅全能足球，Tiki-taka脫胎於全能足球，但兩者好大分別。朗奴高文之前教修咸頓、愛華頓，甚至荷蘭隊，踢嘅波已經好過時，證明跟唔上時代嘅進步。

陣容大變動

巴塞長遠係要走出美斯陰影，年過30嘅佢已不足以單天保至尊。換言之，巴塞呢個夏天要陣容大變動，但巴杜美嘅任期得番一年，有邊個願意參與冇將來嘅計劃？有嘅，不過唔慌好嘢，好似新任體育總監叫柏拉尼斯，兩年前被基達菲炒魷後一直待業。朗奴高文亦唔會有將來，另一主席候選人方特已經先小人後君子，話一上台就炒教練，換上中場大師沙維。

朗奴高文呢次真係衝動咗，唔係所有全能足球人，都可以教出精采嘅巴塞足球，03年至08年帶領巴塞幾成功嘅列卡特，後來教其他球隊就現晒形，4年前宣布退出教練生涯！佢喺巴塞之所以好成功，係因為朗拿甸奴、伊度奧呢班天才。

朗奴高文嘅執教能力好平庸，呢次拍心口入魯營救亡，義氣、膽識、精神都可嘉，不過就注定會係另一個悲劇。佢出年喺屋企睇歐國盃嗰時，應該會覺得慨嘆：早知今日，何必當初呢？