阿茂起題

寫稿佬屬高危行業，隨時帶埋屋企人返工，尤其達聞西呢類惹火尤物，好記得入行第一篇專欄，就收到讀者嘅手寫投訴信，字數多過原文咁滯！嗰篇主題係鬧國足屎波，讀者當然鬧我「賣國賊」啦！

惹火寫手需要滅火編輯，「辣咗啲喎」、「係咪盡咗少少啊」，呢類溫馨提示好緊要，有時寫起上來倒瀉水咁，搞到長江泛濫就無謂啦！不過，遇上大陸《新浪體育》啲阿茂編輯，冇嗰樣整嗰樣，就真係倒火水救火！

話說日前《新浪》有篇奇文《國足迎利好消息敍利亞隊7人感染新冠肺炎》，原本標題好平實講番個人數，呢位編輯手多多加埋「利好消息」4個大字，搞到對手確診國足執到寶咁，連內地網民都話太涼薄。

好嘅評論應該有立場，以事實同道理講服人；新聞稿就要客觀公正；好嘅大題呢？當然係為文章畫龍點睛，吸引讀者眼球睇埋內文。至於嬉笑怒駡式文章，就要過癮得嚟唔好過火，傷害到感情就唔係幾好啦！

編輯停職

《新浪》網隨後發表道歉聲明，稱天津新浪嘅編輯擅自改題已停職，仲嚴重警告總編輯兼罰錢。嘩！個編輯一定好委屈定啦！亞洲區世盃外四十強賽對手多人確診，起個「有請小鳳姐」嘅題賀下都唔得？

就係唔得！做得傳媒人、寫字人，最起碼能力係掌握民情，知道讀者心態同社會現況，咁先可以同讀者處於同溫層！呢位編輯明顯離晒地，讀者對國足一早無期望，對傳媒盲目吹捧一早反晒胃，仲敢攞新冠肺炎自high？

不過，上周中超都出現同類事件，大連廣播電視台嘅評述員王鵬，知道對手河南隊外援巴素高感染病毒，竟然忍唔住話：「要多謝新冠！」結果公開道歉兼停職。所以話，飯可以亂食，說話唔可以亂講，文章更唔可以亂寫。

呢單改題趣聞夠騎呢，不過有樣嘢要讚下內地網民，佢哋真係清醒咗好多，唔會咩都民族主義上頭，好嘅讚唔好嘅鬧。達聞西希望國足都跟住進步啲啲咁多，到咗2020年都仲係畀人鬧？究竟幾時可以畀機會我讚下啊？

下一篇：	槍手裁員奧巴加薪
上一篇：	周四主要足球賽果及主要足球賽程

文章：