阿婆戴綠帽

先講明「阿婆戴綠帽」唔係廣東歇後語，不過今日個主角真係老婆擔遮（陰公）啦！阿特蘭大嘅33歲中場伊利錫，性格和藹可親，操練又懶懶閒，於是有個外號叫「婆婆」，佢7月11日之後就冇出過場！

伊利錫係球隊主力，今季出場34次入21球、9個助攻，最巴閉係歐聯十六強對華倫西亞兩回合入5球，協助球隊大勝8比4。可惜，一場新冠疫情令呢位老將患上抑鬱症，最後6場聯賽缺席，嚟緊歐聯八強都唔會踢。

阿特蘭大宣布係「個人理由」缺席，幾份意大利報章就大做文章，話伊利錫之前返家鄉打算畀個驚喜家人，點知撞正老婆同個陌生男人一齊，呢勻唔慌唔「驚唔驚喜，意唔意外」啦！直頭頹到想掛靴！

至於另一版本關疫情事。話說伊利錫出世冇耐就喪父，幾歲就喺波黑地區見過屠殺，之後同媽咪逃難去斯洛文尼亞。呢次貝爾加莫係意大利最大嘅疫區，伊利錫睇住軍車拉棺材嘅場面，諗起細個嘅痛苦回憶。

究竟邊個版本啱呢？達聞西經過一輪調查，覺得「阿婆」戴綠帽嘅機會唔大。首先，伊利錫近日都有放同太太嘅相片，太太對住鏡頭微笑，佢就用手揜住個口。睇個氣氛唔似經歷過感情大風暴，應該係意大利傳媒老作。

婚姻無裂痕

不過，班網上判官們就攻陷伊利錫個IG，不斷留言鬧佢個老婆，唔知仲以為佢哋係苦主咁。而伊利錫又係奇怪，又唔刪惡意留言，或者索性關閉留言區，最弊上面仲有一對子女嘅圖片，咁樣真係唔係幾好囉。

阿特蘭大尊重伊利錫私隱，一直唔講離隊原因，留番俾當事人講。教練加斯柏連尼當然濕滯啦，8月12日歐聯就要對法甲勁旅巴黎聖日耳門，如今冇咗一位中場嘅側擊猛將，晉級機會肯定大打折扣。

「冇咗伊利錫，對球隊打擊好大！希望路爾斯梅利爾、馬利路夫斯基可以取而代之啦！希望佢好快可以振作，下季可以重返球隊。」加帥講。照教練個口氣，伊利錫真係可能引退，咁絕對係球壇一大損失。唔理伊利錫出於咩理由退隱江湖，達聞西都尊重同支持佢。佢克服過人生諸多磨難，希望過番啲平淡幸福日子啦！

下一篇：	開操
上一篇：	如何解讀VARK

文章：