《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年8月3日
好多嘢唔可以慣，一慣咗就大件事，一句「約定俗成」就抹殺幾多傳統？達聞西以前講開「一件污，兩件穢」，一查先知原來講錯咗，正確應該係「一件穢，兩件穢」，咁駁落近年出現嘅金句：「三件無所謂」，就更加順口啦！
呢句廣府話歇後語，意思係做一次衰嘢，第二次再做就冇咗罪惡感，於是就一不離二、二不離三、四、五、六、七啦！睇番呢段期間嘅香港，相信大家都有同感；不過阿Q啲諗，咁樣亂嚟落去呢，對粵語文化嘅傳承有幫助都未定。
真係咪再背住良心做嘢囉！咩天王老子咁巴閉保到你一世啊？講錢、夠惡、夠任性，邊個比得上沙地阿拉伯王室呢？王儲薩勒曼之前打算以3億鎊入主喜鵲紐卡素，以為獅子撲兔、飛鷹撲鼠啦！一輪擾攘過後畀人嗌「過主」！
三件無所謂
怪得邊個呀！鬼叫沙地王室雙眼生喺頭殼頂？居然以國家衞星明目張膽偷播英超、世界盃、NBA等頂級賽事，擺明當版權條例係張廢紙。英超各隊就捉住呢樣反對紐記賣盤，認為係引狼入室！英超乾淨企理，又點會畀粒老鼠屎搞禍煲粥啊？
近日有傳，沙地王室畀英超一腳伸出英倫後，退而求其次睇中意甲嘅AC米蘭。達聞西身為紅黑兵團fans，覺得意甲聯本身藏污納垢，假波、種族歧視、暴力樣樣齊，而且目前國米個班主係蘇寧財團，AC米蘭前任班主又係中資財團。
既然招牌球會米蘭雙雄都染過紅，沙地王室入主聖西路又有咩問題？人權紀錄唔好？體育同政治要分開！國際形象不堪入目？畀啲時間重新做人囉！大家咪睇達聞西平時癲癲狂狂，骨子裏都係大愛左膠，睇美國總統特朗普就梗係唔順超啦！
一件穢，兩件穢，三件無所謂，意甲淪為歐洲二流聯賽，得番祖雲達斯可以喺歐洲立足。再睇AC米蘭show新波衫，仲要推伊巴謙莫域做主角；國際米蘭叫做有財力，點知又淪為英超次貨收留所：阿歷斯山齊士、盧卡古、域陀摩西斯、艾舒利楊格，唯一似樣嘅基斯甸艾歷臣唔到半季就話想走頭，就知道幾咁不堪啦。
一個聯賽嘅沒落，係所有持份者一齊造成嘅，到最後每一個人都係輸家！唯一嘅贏家係薩勒曼呢類外來者。剝緊花生嘅球迷咪得意，英超睇得多會厭，意甲唔再係意甲，從欣賞唔同足球風格嘅角度，同樣少咗個選擇。
放大圖片 / 顯示原圖
訂戶登入
