普巴唔食波餅

從政者唔怕畀人鬧，做藝人唔怕畀人笑，踢波嘅人就唔怕食波餅。紅魔鬼中場大佬保羅普巴，禮拜三聯賽主場對韋斯咸，竟然以雙手護住塊面，結果禁區內犯手球輸12碼，害球隊1比1和波，唔見咗寶貴嘅兩分，分分鐘無緣下季歐聯。

普巴呢個動作將畀人笑成世，完半場前迪格蘭賴斯30碼外射罰球，佢企響禁區內排人牆，面對炮彈咁嘅來勢，平時也文也武嘅佢見踎唔切，索性舉起雙手遮面，結果犯天條輸十二碼！達聞西聽過打人咪打面，乜踢波都有呢個規矩咩？

結果，安東尼奧為客軍操刀命中領先半場。半場沖個涼返到場，安東尼奧同曼聯嘅波基斯費南迪斯細聲講大聲笑，仲忍唔住雙手護面「案件重演」，嘻嘻哈哈大笑。最搞笑係，普巴就企響不遠處，仲碌大隻眼望到實，好似拍緊笑片咁！

縮就笑一世

唓！咪又係得個望字？普巴夠膽上去鬧鬼佢哋？好彩下半場格連活特追平1比1，總算搶番一分。曼聯得63分排第三，同分嘅車仔排第四，紅魔鬼煞科日對手李斯特城少1分排第五，所以下場作客如果輸波嘅話，就會連續兩季無緣歐聯。

普巴都知自己鵪鶉咗，賽後喺更衣室向隊友們道歉。隊長哈利馬古尼都話中有話：「嗰球波冇理由避，應該以面相許嘛！不過普巴都係自然反應，賽後同大家講咗唔好意思。」呢位隊長講到自己好沙膽，仲好體諒普巴咁喎。

雖然場波冇球迷在場，但網民嘅眼睛係雪亮嘅，佢哋發現一齊排人牆嘅科素文沙同連迪路夫，當時好似見到炸彈咁又轉身又踎低，馬古尼係最後一個望到個波，都下意識縮一縮個頭。可見，呢個手球真係唔怪得晒普巴！

不過，怪唔怪佢係一回事，但成個畫面咁滑稽，網民攞唔攞住嚟笑又係另一回事噃！尤其係普巴見到有人笑緊自己，嗰副嬲爆爆嘅表情，真係大快人心啊！咁又係啊！當民眾見到平時蝦蝦霸霸嘅人，有一日畀更加惡嘅人蝦，個心係會特別涼！

「你都有今日啦！」、「你都蝦得我耐啦！」，呢種心態同普巴一樣懦弱，但始終係人類嘅本性，或者係馬古尼口中嘅「自然反應」。希望天下壞人都有被收拾嘅一日，咁先係有天理吖嘛！

下一篇：	周三主要足球賽果及主要足球賽程
上一篇：	綠面具

文章：