《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年7月22日
香港有啲隔夜油炸鬼，成日話新一代阻住佢收成，幾十歲人賺到肚滿腸肥，都仲未收割夠？做人去到咁上下要不問收穫只問付出，唔好淨係顧住荷包至得㗎！AC米蘭前副會長加利安尼，就真係卜卜脆嘅油炸鬼啦！
呢位光頭佬曾經叱吒球壇，幫老闆貝魯斯科尼建立米蘭王朝，不過自從貝老闆賣咗球會畀大陸富豪，呢對拍檔已經淡出世人嘅視野。不過，加利安尼生於米蘭蒙扎，75歲人仍不忘為呢座城市奮鬥，兩年前甚至東山復出。
話說，加利安尼聽講意丙球隊蒙扎要賣盤，第一時間打電話畀貝老闆，「OK！去馬！」接到柯打即刻聯絡賣家，對方問：「你咁有江湖地位，點會睇中蒙扎啊？」加利安尼答：「我死係蒙扎鬼！過去31年借咗畀AC米蘭！」
丙組再起風雲
幾個鐘頭後，蒙扎已經係貝老闆嘅，可以講係迷你版AC米蘭。生於斯長於斯，加利安尼想為蒙扎建立一支勁旅，等家鄉喺世界有番啲地位，「呢度90萬人口應該有隊似樣嘅球隊！你睇街坊球隊阿特蘭大幾威！」
結果，蒙扎易主後兩年，就以榜首資格取得意乙升班資格。「愛AC米蘭定蒙扎多啲？等升咗上意甲先問我啦！」AC米蘭名宿、執教拿玻里嘅加度素恭喜升班，加利安尼非常感動：「多謝佢嘅祝賀，令世人聽到蒙扎嘅名字！」
加利安尼開口埋口不離蒙扎，呢種情懷喺新冠疫情時代好緊要。因為，全世界經濟都受疫情影響，如果當地人都唔出一分力，經濟同社會都幾難復甦！個個只顧住自己收成嘅話，恐怕連防疫工作都唔會做得好！
取之社會用之社會，加利安尼將繼續大sell本土情懷，除咗唔排除邀請馬甸尼、卡卡等名宿助陣外，下季組軍都以土炮為主，好似馬甸尼位公子丹尼爾、國際米蘭前鋒施巴斯坦艾斯普薛圖等，咁先凝聚到成個城市吖嘛！
人有三衰六旺，球隊有興衰起跌，好似西甲勁旅拉科魯尼亞，就40年來第一次降落西丙。人生猶如潮水漲退，不論你係老一代定新一代，當潮水退卻嘅時候，就知邊個冇着泳褲！冇話邊個阻住邊個收成㗎！
放大圖片 / 顯示原圖
訂戶登入
