《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年5月30日
活喺呢個亂世，千企咪手多多，社交網站亂咁like，分分鐘搞到被人圍剿。皇家馬德里球星艾斯高就係衰多手啦！佢日前畀咗個like反抗議者嘅post，害到明星老婆莎拉莫被網民喪鬧，結果要出聲明澄清自己立場。
「我想講，我唔係綠色、紅色、橙色或藍色……不過係一個普通西班牙人，對國家現狀感到疲倦、失望、擔憂，國家飽受新冠疫情蹂躪，死亡人數節節上升，我希望政客們放下立場，團結起來抵抗疫情！」艾斯高寫道。
嘩！香港分黃藍兩隻色，達聞西已經眼花繚亂，乜西班牙啲色仲多啊！真係要睇清睇楚先好講嘢啊！不過，點解艾斯高企錯邊撐政府，大家會將矛頭指向佢老婆呢？大佬，正所謂一人做事一人當，做人最緊要公道喎！
死亡恐嚇
網民先唔同你講公道，自從3年前王子艾斯高同莎拉莫墮入愛河，皇馬球迷就將仇恨燒向呢位女星。艾斯高一向乖乖仔，莎拉莫就成日喺社交網曬肉照放閃，仲拉埋另一半攬攬錫錫，網民咪覺得莎拉莫帶壞艾斯高囉。
好似呢場小風波咁，網民一面倒鬧莎拉莫，話係佢左右艾斯高嘅政治立場，仲誇張到攞約翰連儂同小野洋子相比！當年小野洋子被披頭四歌迷認定係樂隊拆夥嘅禍首，變咗全球音樂公敵咁滯，乜到咗二十一世紀都仲係咁啊？
咪以為達聞西嘩衆取寵啊！舊年艾斯高受傷同表現欠佳嗰排，就有球迷喺網上死亡恐嚇莎拉莫，留言話：「你過唔到聽日！」估唔到啲西班牙球迷都幾偏激，唔怪得之呢次艾斯高要閃電澄清，以免球迷失控做儍事。
西班牙社會響疫情下神經緊張，好多政客認為政府抗疫不力，但亦有人覺得政府經已盡力，不如上下一心抗疫好過！支持政府者鬧示威者係「混蛋」，反政府者就鬧武力鎮壓嘅警察係「混蛋」，於是雞蛋、鴨蛋、鴕鳥蛋飛來飛去，亂過《亂世佳人》啊！
計我達聞西話齋，無謂浪費啲蛋啊！不如溝埋做煎雙蛋吖笨！呢次疫情超乎人類想像，有咩嘢留返打敗疫情後先講啦！艾斯高亦係成年人，有咩嘢直接問佢，唔好再搵莎拉莫嚟出氣！
放大圖片 / 顯示原圖
訂戶登入
