種咩因得咩果

沙地主權基金入主紐卡素單嘢，隔一排就有個新風向，古人有云：好事多磨；壞事嘞喎，呵呵，真係鐵柱都磨成針啊！本來單刁係皆大歡喜，紐記肥佬班主艾殊利同球迷想賣，可惜沙地過去種下嘅惡因，就得出今日嘅惡果。

達聞西麻麻地鍾意講政治，《衞報》周二報道指世界貿易組織（WTO）已經搵到證據，證明沙地盜版體育直播網beoutQ同政府有關！以往沙地主權基金方面一再否認，話beoutQ同古巴同哥倫比亞有關，原來係大話連篇！

講返beoutQ，睇個名已經知係老翻嘢！冇錯啦！就係老翻卡塔爾賽事轉播頻道BeIN Sports啦！由於沙地同卡塔爾關係緊張，佢哋竟然偷對方賽事轉播，然後免費響沙地直播，搞到英超、世界盃等賽事紛紛向WTO投訴。

WTO經過調查後，發現beoutQ透過沙地嘅Arabsat通訊衞星傳送，主要股東係沙地政府，總部亦係設於當地。雖然Arabsat已經撤銷beoutQ，但呢個轉播大盜依然透過直播盒子，偷播外國嘅體育賽事，真係死不悔改啊！

依家好啦！以為鬼鬼鼠鼠偷番薯好醒，等到要收購紐記就知道有手尾啦！之前，有傳英超聯賽會已經同意呢單收購，預料6月初作正式宣布！如今，《衞報》收到WTO份報告，英超聯一樣都收到，呢單交易隨時成交唔到。

或有暗湧

冇錯，英超係認錢唔認人嘅聯賽，之但係沙地王室實在太劣跡斑斑，除咗美帝都公開要求徹查beoutQ外，人權等各方面都係唔合格。試問，如果打開門畀呢啲班主入場，對成個聯賽嘅形象有損，分分鐘為粒糖、輸咗間廠㗎！

國際社會經過新冠肺炎蹂躪，價值觀上出現好大變化，唔再好似近20幾年搵錢至上，將人權等普世價值掟入垃圾桶。因為大家都明白錢賺得再多，一場災難降臨就輸個凸。唔可以再畀唔同價值觀嘅人為所欲為，否則係全世界遭殃。

紐記可能短期都難以崛起，但英超唔可以為一隊波犧牲成個聯賽；希望紐記球迷咬緊牙關，搵班主好似搵另一半咁難，學已故賭王何鴻燊話齋：「質地」一定要好啊！

下一篇：	伊卡迪願留巴黎
上一篇：	不設防

文章：

種咩因 得咩果