《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年5月21日
香港人開口埋口嘅「攬炒」，呢一年可謂風行全球，就連內地官員都引用，邊個話80、90年代過後，香港文化已經微不足道啊？全球新冠肺炎大流行，隨時都係攬炒嘅結果，當然要世衞同美帝調查過後，先可以證實有冇人蓄意播毒，大家放長雙眼啦！
世界日日變年年有潮語，法國嘅Larousse encyclopedic dictionary（拉魯斯百科全書詞典），今年就選咗西班牙詞「remontada」，意思係反敗為勝咁解，不過最準確翻譯係廣東話嘅「反吸」。有賭開波嘅香港球迷，都知道反吸係指響機會極微嘅情況下，突然來個驚天大反擊，好似2005年歐聯決賽利物浦半場反勝AC米蘭嘅「伊斯坦堡之夜」。
巴塞反勝入詞典
拉魯斯百科全書選中反吸，係因為2016/17球季歐聯十六強，巴塞隆拿首回合作客吞巴黎聖日耳門4蛋，驕傲嘅法國人當然坐定粒六，覺得可以淘汰由美斯、尼馬坐鎮嘅巴塞，結果巴塞次回合主場反勝6比1，聖日耳門兩回合計倒輸5比6。
呢場經典反吸大戰，達聞西當然印象深刻啦！聖日耳門係歐洲當紅炸子雞，4球在手晉級機會十拿九穩；估唔到巴塞尼馬完場前兩分鐘梅開二度，加上吹雞一刻沙治羅拔圖嘅入波，將對手淘汰出局，當時法國傳媒都以西班牙文「remontada」為標題。
同時入選《拉魯斯》嘅新詞仲有Rapinoe——取自美國女足球星拉賓諾嘅姓氏，呢位球星本身係一名同性戀，舊年帶領美國隊獲得女足世盃冠軍後，高調為女同志及女足發聲，公開抨擊美國總統特朗普更加聲名大噪，近日仲有人叫佢挑戰侵侵個總統寶座添！
所以話呢，曼德拉講話體育可以改變世界，呢句說話真係冇講錯。香港人唔知係咪睇得波多，學識面對逆境唔放棄，本輸嚟打博反吸嘅巴塞精神。講真，出年法國呢本詞典分分鐘選埋「攬炒」入去，咁香港人就真係威啦！
放大圖片 / 顯示原圖
訂戶登入
