2020年5月14日
達聞西後生嗰陣唔算係叛逆青年,已經將荷爾蒙發洩響波地,但仍然超錶搞到一面暗瘡。有邊個青春期唔反叛啊?只要唔係作姦犯科,做對社會有益嘅嘢,有時行歪少少、衝動咗,係值得體諒同理解!
英國全國封城期間,車仔21歲新星美臣蒙特曾經偷偷地去公園練波,結果搞到全城震怒同指摘,球會更要向公眾道歉。外界抨擊無可厚非,皆因抗疫重要過一切,作為球星知法犯法,的確係立下壞榜樣。
不過,今季彈起嘅蒙特非池中物,佢事後立即向提攜佢嘅領隊林柏特道歉,最終都獲得恩師原諒。之前寫文抨擊過蒙特嘅足球作者們,反思後都承認對呢位新人太苛責,講到尾佢違反隔離令都係為踢波啫。
咁又係啊!好似英格蘭資深國腳基爾獲加咁,之前竟然偷偷參加午夜派對、睇艷舞等等,相比起蒙特簡直係人神共憤啦!而且呢位曼城球星成29歲人,出席過世界盃等大場面,點可以仲好似牛奶仔咁呢?
獲主帥體諒
林伯又點會唔體諒蒙特呢?2001年美國911恐怖襲擊翌日,23歲嘅佢響美國遊客面前醉酒嘔吐,結果被車路士罰款。林伯多年後反思:「我當時年紀細,當時根本唔應該去飲酒慶祝,我之後10幾年都努力變成更好嘅人。」
人生係咩呢?唔係買到幾多層樓,贏到幾多個大獎,而係汲取教訓變成更好嘅人,呢點相信自稱「壞咗」嘅許志安會非常同意。達聞西亦都希望台灣舞王羅志祥都反思一下,點樣迎接人生嘅低潮與考驗。
年輕或年長都唔係罪,不過相對上咗年紀嘅人要改就難啲啦。做咗咁多年人,見過無數人與事嘅變遷,都變唔到一樽入到口嘅紅酒,恐怕已經無可救藥。好比一罐過咗期嘅罐頭,就唔好再開來食啦,掟落垃圾桶好過。
最近,本土老樂隊溫拿嘅成員響記招話想同香港歌迷修補關係,乜香港撕裂成咁啊?連偶像同歌迷都會決裂?不過,正所謂「逝去的感情如何留得住……」呢班老歌手一定搵到相同立場嘅歌迷嘅;天要下雨、娘要嫁人,由得佢哋啦!
放大圖片 / 顯示原圖訂戶登入