《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年5月13日
英國政府禮拜一為體育賽事開綠燈，6月1日起可以閉門作賽；同日英超各隊開會決定復賽事宜，點知20隊阿頭傾唔埋纜，尤其係下游球隊反對中立場比賽。政府着綠燈、球會轉黃燈，球員又着緊咩燈呢？
答案係球員支燈壞鬼咗，黃綠紅眨個不停，唔少頂級球員反對復賽，好似曼城射手阿古路同韋斯咸中場蘭仙尼，不過好似1月由熱刺外借到紐卡素嘅丹尼路斯咁，拍片爆粗大鬧嘅真係好少見。
「政府話足球回歸可以提升國家士氣，國家士氣關我X事啊！人民性命堪虞，確診同死亡人數唔跌番咁上下，都唔好同我講復賽！政府嘅宣布我聽都冇聽，咩6月1日恢復比賽，我一啲都唔在乎！」路斯講。
英國外交大臣藍韜文率先提出「振奮士氣論」，走出新冠病毒死門關嘅首相約翰遜，都希望盡快幫國人建立信心，等商業同社會活動盡快恢復。不過，正如路斯話齋，疫情數字居高不下，呢個時候講士氣就嘥氣啦！
路斯好彩喺英國啫，換轉喺中國批評國家政策，重則社交網站封號兼失蹤，輕則遭全國五毛憤青攻擊。好似中國史上頭號前鋒郝海東咁，近日響網上支持武漢作家方方，捍衛對方講真話嘅權利，結果遭到網民攻擊。
郝海東外號「大炮」，軍人出身，又係中國球王，一直都路見不平、擘口就鬧。方方不過係出本「封城日記」，記錄武漢封城下嘅生活點滴同感想，竟然被當作文革黑五類咁批鬥，有正義感嘅「郝大炮」自不然炮聲隆隆啦！
支持方方
呢位球王太太亦係猛人——中國羽毛球天后葉釗穎，呢對球王球后夫妻同心，齊齊向五毛、小粉紅抽射兼扣殺，內地有良知嘅網民讚男嘅係怒目金剛，女嘅就菩薩心腸，希望呢對良心名將唔會有手尾跟啦。
達聞西睇過郝海東同五毛嘅較量，爭辯內容其實冇咩新意，離唔開貪官橫行有咩好驕傲啊？咩叫真正愛國等等。呢啲嘢響海外同香港論壇嘈咗10幾年都有，估唔到班五毛毫無長進，又或者佢哋都係當打份工？
所以話呢，郝海東夫婦都係慳番啖氣暖肚，唔好同班職業鍵盤無賴周旋，搞到自己心情唔好就無謂啦！何況民族劣根性嘅嘢，魯迅、柏楊好多年前都鬧過啦，有用咩？
放大圖片 / 顯示原圖
訂戶登入
