《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年5月11日
感動啊！中國足球有救啦！瀕臨破產邊緣嘅中超球隊天津天海，20幾名職球員寫信畀足協，提出願意唔收人工完成今季聯賽，仲話可以自籌營運資金添！中國球員向來拜金，咩事突然間轉性？仲打埋手指模添，搞乜傢伙啊？
原來，天津天海前身係天津權健，老闆束昱輝1月因非法傳銷遭拉人封艇，球隊數簿滿江紅下以零蚊轉手，最終冇人吼要由天津足協接管，呢4個月來一直等緊新班主，後來萬通集團提出入主點知傾唔掂，周六宣布取消單deal。
話說中國足協今季提出「中超準入機制」，規定球隊必須設黨團組織、女子隊，背後企業亦要連續3年有錢賺，就呢3個條件已經嚇走好多企業。本身債務纏身嘅萬通想假借救世主之名，博懵玩中超希望起死回生。
萬通之前同拖欠3個幾月人工嘅天海講，要足協保證「準入」先肯泵錢，足協班官當然唔肯過佢啦！於是，天海球員們兩次致信足協，不過語氣就愈來愈鵪鶉，由上月初「誓死依法捍衞踢中超權利」，變成前日嘅「懇請領導幫忙」。
關領導咩事呢又？原來中國足協拖欠天海1500萬聯賽花紅未畀，呢筆數足夠支付職球員薪水，但足協以天海與外援有欠薪官司為由，拖住唔肯畀呢筆錢。所以呢？成件事關係千絲萬縷，複雜到達聞西頭都暈埋。
「準入機制」唔準入
旁觀者頭暈，天海職球員就頭疼，外號「大頭」嘅領隊李瑋鋒就頭都大。呢兩次公開信都附上球員嘅紅色手指模以示決心，不過4月嗰封有40幾個，仲有孫可、楊旭等大牌球星，但日前嗰封就得返一半指紋，仲好多係預備隊成員添！
哎，打波搵食啫，唔使搞到好似借大耳窿咁啩！內文仲寫道：「自願部分放棄或全部放棄酬金……以完成比賽任務……」好多網民就話，乜中國球員突然間咁有足球熱誠啊，點解之前又唔多覺咁有heart呢？
不過又唔可以怪晒班球員，好多束昱輝呢類借球隊圈錢嘅金主，好似萬通咁去年總利潤得5億，根本冇雄厚資金長期經營。天海好多主力搵到下家就走人，李瑋鋒同班預備隊都係及早離去，唔好浪費時間垂死掙扎啦！
放大圖片 / 顯示原圖
訂戶登入
