牛丸係港女之光

香港地人才輩出，女性更係發光發熱，好似許鞍華、吳靄儀、張小嫻等等，多到不能盡錄，希望全人類擦亮雙眼，唔好畀娥姐代表晒港女。球壇亦有香港之光——「牛丸」陳婉婷，佢當年帶領東方贏港超聯，成為史上首位贏職業聯賽冠軍嘅女教練。

牛丸舊年北上擔任中國女足U16助教，後來以主教練身份獲亞少盃季軍，再一次為港增光！記得香港名宿「智多星」郭家明都係做過中國足協嘅技術主任，牛丸直頭做埋國家隊教練添，仲唔係維港後浪超前浪？今年先得嗰31歲啊！

可惜，爆自中國武漢嘅新冠疫情肆虐全球下，牛丸同中國足協傾續約都hold住咗，呢幾個月同本土教練一樣係零工作，幾個外國面試嘅機會又因疫情延期。不過，少少阻滯點打擊到呢班足球人啊？牛丸就趁呢段時間研究戰術，他朝一日再殺出香港。

目標再殺出香江

足球界陷入冰河時期，偏偏遇上「唔識體育」嘅「體育、演藝、文化及出版界」功能組別議員馬逢國，馬生份人夠晒直：「唔係疫情，都唔知有咁多教練！」唓！馬生電影人出身，香港電影咪一樣係一潭死水？你幫過香港電影界啲咩呢？

做嘢講能力、知識，但最重要係有冇心！馬生做議員超過20幾年，如果有心做好呢份工嘅話，一早做咗體育專家啦！一個人從幼稚園到入大學，都不過20年多啲啲啫！哎！講起呢啲就掃興，都係唔講啦！講返牛丸先！

吳子維成立咗足球教練大聯盟，身兼政府青年事務委員會成員嘅牛丸，一知道就二話不說就加入其中，仲利用自己人脈幫助業界添！呢種人溺己溺嘅仁愛精神，實在係社會領袖都應有嘅特質，希望薪火可以相傳落去。

港人同香港足球呢10幾年，真係乜嘢風浪都見過，之所以可以乘風破浪，所靠嘅正正係同舟共濟嘅精神，用21世紀嘅語言嚟講，就係齊上齊落！講真，我哋連全球肆虐嘅新冠病毒，都可以控制到每日得個位數新病例，就知道幾咁齊心啦！香港人，繼續加油！

下一篇：	曾綺婷出院
上一篇：	足球壇確診人士表

文章：