出淤泥而必染

中超豪門廣州恒大投資120億人仔興建新主場，設計概念取自出淤泥而不染的蓮花，成個場館好似半開的花朵，可容納10萬人之多，號稱超越巴塞隆拿嘅魯營球場。達聞西聽到爭啲笑甩下巴！喂！唔係起得夠大，就係偉大㗎！

達聞西除咗得閑鍾意吟下《垓下歌》，周敦頤嘅《愛蓮說》都好歡喜！自不然覺得恒大個「蓮花」球場有特別含義，係咪想話畀全國人民知：「雖然中國足球環境猶如一灘淤泥，但恒大會做到出淤泥而不染！」係咪咁樣呢？

應該係啦！唔係中場大將于漢超日前塗改豪車車牌，將「E」字遮一橫變成「F」，恒大老闆許家印又點會無懼外界壓力，宣布炒呢位球星魷魚呢？解約理由係觸及球會嘅「九開除」底線，話之你幾巴閉都好，唔可以破壞「花中君子」嘅球會新形象。

「蓮花」球場有含義

于漢超呢單嘢夠憨居，點知大連同鄉隊友楊旭同前輩郝海東更憨居，竟然公然響社交網站撐對方。楊旭仲讚于生人品好，係自己嘅好榜樣，仲話上帝都會犯錯何況係人，勸大家鬧兩句好啦！郝海東更加批評恒大唔尊重球員權益。

嘩！呢兩位名宿膠唔膠啲啊？塗改車牌係知法犯法，咁都叫做人品好好？中國球壇啲道德標準唔係低成咁啊？如果人人學似于漢超咁，個社會會亂成點呢？郝海東作為老前輩，應該鬧醒于漢超，而唔係一味盲撐囉。

不過，全世界經過爆自中國武漢嘅新冠肺炎洗禮後，都應該知道呢個國家有幾咁負責任？政府對自己人民嘅身家性命尚且如此，諗深一層，于漢超塗改車牌唔係好小兒科咩！不過，人類點都應該仰望道德高地，而唔係以道德低窪為榜樣嘅。

于漢超單嘢仲有更荒謬嘅，將佢塗改車牌短片放上網嘅佛山球迷聯盟成員馮姓女球迷，事後竟然被上頭組織恒大球迷聯盟開除會籍，原因係喺互聯網發布不正當言論，嚴重影響廣州球迷形象！哈哈！讀者們，估唔到個ending係咁呢！

下一篇：	美網不閉門作賽
上一篇：	射靶

文章：