打劫要趁「疫」

源自武漢嘅新冠病毒，打咗全世界人嘅荷包，呢幾十年賺到嘅人民幣隨時嘔番晒出來。老友阿漆個豬肉檔都拍烏蠅，啲客嫌豬肉又貴又有酒精味喎！真係三十六行，行行嗌救命，惟有勒緊褲頭啦！

疫情作亂下，竟然有人趁火打劫，前車路士球星艾殊利高爾同女友喺豪宅避疫，竟然衝入幾個戴面罩嘅賊佬，將呢位球星五花大綁成大閘蟹，然後施施然搜掠金銀財寶。連倫敦豪宅區都夠膽入屋搶截，英國啲賊認真狼胎。

不過講到趁「疫」打劫，蒙面賊又點及得上政客啊！倫敦巴基斯坦裔市長簡世德，竟然話疫情下球星應該承擔更多減薪責任：「人工冇咁高嘅自然要更多照顧。」佢咁講係因應球壇要非足球部員工減薪嘅爭議。

英超道德真空？

呢個世界富人佔少數，簡世德咁講實多人支持㗎！不過，做政客要政治正確外，都要講下公道，冇球星打好波吸引全球關注，你估英超有冇咁多工作職位呢？何況，大部分球星向來樂善好施，疫情下更加係出錢出力。

簡世德最令人詫異嘅一句話係：英超足球金錢掛帥，其中關鍵就係道德真空！嘩，倫敦有個咁「左膠」嘅市長，難怪該市勁旅熱刺嘅會長利維，夠膽照袋700萬鎊年薪，然後厚顏要球員和教練組以外職員減薪兩成。

收入高等如冇道德？簡世德、利維咪蝦球員年紀細啊，73歲嘅前熱刺領隊哈利列納都睇唔過眼，為500幾名員工講公道話，「好似熱刺咁嘅大球會，竟然做啲咁嘅事？不敢相信！熱刺班主係全球最有錢人士之一。」

哈利列納都贊成球員減薪，但應該係出於自願。「熱刺球員平均周薪8萬到10萬鎊，減10%完全可以接受。我知道只要有人企出來，佢哋就會跟隨減薪。我希望英超所有隊長企出嚟呼籲：兄弟們！齊齊救救職員吧！」列納講。

英國職業球員協會主席哥頓泰萊，就話問題唔係出自球員高薪，而係球會經營缺監管，呼籲各界唔好因疫情而放過管理層。熱刺就係好例子，唔係使10幾億鎊起新球場，職員使鬼減薪咩！

下一篇：	港超八隊贊成腰斬
上一篇：	足球壇確診人士表

文章：