熱門:

2020年3月16日

達聞西 競技研究院

監獄球王 贏咗隻豬

上一代成日講:讀書唔成唔緊要,最緊要學門手藝。達聞西最近明白呢個道理,巴西球王「細哨」朗拿甸奴落難巴拉圭監獄,上周五憑一身球技奪得監倉5人賽冠軍,獎品係16磅大肥豬一隻,呢個冠軍恐怕C朗、美斯都冇本事贏啦啩!

時光飛逝,細哨坐監足一個禮拜啦!達聞西繼續從Twitter跟蹤佢嘅日常生活,日前就睇到幾段矇查查嘅片,係監獄5人足球賽嘅偷拍片。呢位39歲球星瀟灑依然,無影腳傳波毫無腳影,笑笑口帶領球隊大勝11比2,個人連入5球兼有6次助攻,仲唔係MVP?

炮製11個入波

據監倉傳出嘅江湖傳聞,對手曾經抗議細哨落場,一度提出唔可以入波,當然畀細哨嗰隊嘅大佬拒絕啦!能夠同球王同場較量兼學嘢,獄中「大儍哥」、「大佬D」等都拍爛手掌,當細哨係神咁拜;佢有波踢更加係笑得燦爛,直頭唔記得自己坐緊監添!

唔單止犯人興奮,網民睇到都忍唔住話:「嘩!原來坐監可以同細哨踢波,早知我都一早入去踎啦!」呢啲當然係笑話啦!不過,達聞西好奇細哨同隊友會點對隻大肥豬呢?唔通喺空地起爐整巴西BBQ,然後同倉友、獄警們分享美食?

獄警維拉就同傳媒透露,呢場球賽令細哨心情好番好多,原來佢之前唔係幾適應,包括飲食同居住環境等,之後仲俾捉去驗新型冠狀肺炎,嚇到鼻哥窿冇肉,好彩結果顯示係陰性。「呢幾日心情好啦!同其他囚犯有講有笑,仲肯出去庭院散散步。」維拉講。

至於細哨幾時可重獲自由呢?除咗阿根廷球王美斯聘請咗律師團隊外,連巴西總統博爾索納羅都開始關注呢單嘢,巴西嘅報章Folha de Sap Paulo報道話總統大人準備出手,向巴拉圭政府提出釋放細哨返巴西,將來有咩法律程序再過去接受聆訊。

從細哨獄中踢波片流出呢件事,可見巴拉圭監獄嘅管理係幾咁兒戲!犯人係咪可以用手機呢?唔通坐監都可以上網嘅?如果係獄卒放段片出去就仲離譜,傳媒畀啲錢就可以偷拍?咁細哨畀多啲錢,係咪可以安排佢越獄呢?巴拉圭政府快啲放人啦,唔係盞繼續丟國家個架啫!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads