2018年8月24日
「你現在哭,有用嗎?」是一把好粗豪的男聲。
「你諗諗你從前點對佢……」是一把好響亮的女聲。
我好自然地望向左手邊,見到一個金毛、一個銀毛和一個黑鬼。再正確一點,是一個染金毛年輕人,一個染紫銀毛雙色的少女和一個皮膚曬得好黑的中坑。
跟住係隻金毛不停地在講粗口,但就無重點,而整段謾罵語言當中是沒有substance的。好明顯,簡單講,金毛男是一個表達能力兼且組織能力好差的人。
銀毛少女間唔中又夾雜幾句內容無甚方向的粗口。
炭烤中坑跪在一個只有黃土一堆的新墳上哭。
就這個場景,人物加對白,再蠢,也估到九成,何況我。
隨着金毛的聲線愈來愈大,我估計他的腎上腺指數亦愈來愈高。突然間,他起腳飛去炭烤中坑的背上。
銀毛少女用手捉住金毛手肘,但又如何捉得住個男人。
中坑當然無反抗,我認為他自己都覺得自己抵打。
「你黐線咩!老豆嚟呀……」好大聲,真的好大聲。其實唔需要咁大聲,係人都估到。
我相信金毛是怕俾雷劈的人,所以當他稍微抬頭,看到有嚿大灰雲在墳場上時,他開始收腳。
就在這時,有嚿毛在我腳邊滑過,Jax真係好煩,打擾我睇戲。
又突然間,有把好正氣的聲線:「在生的,永遠對往生的有遺憾……」嘩,我以為是佛祖。
嚇得我的,不是牛仔在墳場的這一句,而是牛仔的悟性。
「反過來,現在躺着的,臨熄燈前,嗰種遺憾的感覺,有可能要強我們在生的多萬倍,因為再無機會留在這塵世間去補償。」我邊講又邊想起Zoe來。
訂戶登入