熱門:

泡沫都有好多層次

方卓如| 方如玉帥

2017年12月19日

加密貨幣嘅泡沫升幅,令其他泡沫例如股票同地產完全唔入流。泡沫其實都有好多層次,例如啤酒泡沫,泡沫消散後,仲有杯啤酒過你飲。但如果係梳乎厘嘅泡沫,入口有如空氣,咁就正如股票前輩所講,買資產買着空氣,遲早渣都冇。

加密貨幣嘅泡沫,就係可以渣都冇。只不過,佢哋嘅泡沫仍未成形,仲有好大改變空間。Bitcoin面世差唔多10年,係今年你先聽過仲參與買過,3年前Bitcoin仲係小眾玩意,今日已經討論佢會否代替黃金。

下年泡沫會變成怎樣,冇人預到。一朝梳乎厘由虛變實成為蛋糕,到時就冇人話係龐氏騙局。都係嗰句,你成世人都活在泡沫年代,如果一聽泡沫你就行開,你而家應該幾窮。

香港房地產都話係泡沫,但係教授買泡沫,地產大炒家又買泡沫,眼都唔眨,點解釋?睇淡樓市,唔係應該全部沽晒現貨,等跌市撈底?從來睇淡嘅人做嘅嘢同佢講嘅嘢相反,辯稱為市場一面睇好,自己咁有份量,惟有睇淡,將預測變做賭波開盤,個個買曼城,惟有落注曼聯,平衡啲。市民唔係賭大細,係想聽真實情況。人人講升,你惟有講跌,博人哋錯你啱攞掌聲,大開眼界,害了市民。

香港樓市同比特幣一樣,易升難跌, 因為想沽嘅人唔多。買咗樓唔敢沽嘅人大把,6千萬沽咗層樓,你覺得佢好有錢,但佢想買番嚟住嘅樓要一億,佢就覺得自己好窮,唔敢沽樓。比特幣一樣,好多幾千蚊沽咗比特幣嘅,而家揼到大髀內側瘀晒,恨錯難返。手上仲有貨嘅,打死唔會沽。以前叫人買股票,買完要放落床下底唔理佢,好多人都做唔到。但係比特幣買咗唔理佢,好多人做到,大家都要等到泡沫爆破一刻,先至心甘命抵。沽壓唔重嘅比特幣,睇升贏面大過睇跌。除非你有貨,否則唔好立亂沽空期貨,輸死你。

聖誕節接近收爐,今年搵到餐晏仔食。2018年,唔使講,資產組合要有加密貨幣,否則你好難跑贏2017。

 

上一篇瞓身虛擬幣 Overstock本業失禮

下一篇虛擬貨幣投資者 齊說比特幣以太幣熱潮

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads