熱門:

2018年12月31日

麥狄文 金融街密語

增持謎網股坐艇 「大夫接班人」傳按樓

話咁快嚟到2018年最後一日,對於金融圈嘅朋友嚟講,今年確係唔多容易捱。望一望恒生指數由年初三萬三水平見頂後回調,跌到落嚟家下二萬五水平,足足跌咗兩成幾,港股已肯定處於熊市中,而美股亦喺第四季急轉直下,三大指數幾乎亦全部累跌兩成,技術上已步入熊市,咁嘅市況當然難捱。

環球股市唔精神,主要死因係美帝「侵侵」發動中美貿易戰,香港夾喺花旗國同祖國之間,自然首當其衝。

雖然目前經濟數據仍未完全反映貿易戰對香港經濟帶嚟嘅負面影響,但股市一向較實際經濟情況走前幾步,港股插水亦好自然。

今年港股嘅新股集資額即使保持得到,港交所(00388)重奪全球冠軍集資市場寶座,可惜大部分上市新丁嘅表現差強人意,而每日平均成交額係咁縮水,可見市場流動性已大不如前。

市場流動性緊縮,大市成交奀豬唔使講,就連市場嘅其他集資活動都一潭死水,唔少企業活動亦因為市況欠佳而叫停。

靠做deal搵銀 今年多食白果

據阿Man了解,一班靠做deal搵食嘅行家,今年唔少都食白果,靠食老本度日,皆因唔少之前活躍嘅股壇老闆亦自身難保,仲邊有咁多deal交出嚟畀人做。

之前阿Man已經講過,寶島九頭身美女要按樓救男友,之後又有唱片舖欠租欠薪,最終搞到清盤收場。

連一向實力雄厚嘅殼后,亦被傳因為高價接咗甲級寫字樓損手,即使阿Man深信以殼后嘅實力同坐擁豐厚資產,財政狀況絕對健康,但都有咁嘅傳聞出現,其他實力平平嘅莊家或者活躍嘅金融圈人被傳周轉不靈更加多不勝數。

最新鮮滾熱辣傳出流動性出現問題嘅就係跟殼后關係唔錯,被喻為股壇「大夫接班人」嗰位仁兄,自從「詸網50」事件後,由「接班人」領導嘅證券行增持部分「謎網50」股份,而市場更認定佢已漸漸有「新大夫」嘅影子。

可惜一年過去,「謎網50」股份一直唔見有起色,而康宏環球(01019)嘅案件正在審理中,再加埋「大夫」喺中秋節嘅時候返咗香港,仲去埋「雪糕佬」嗰度飲咖啡,相信「謎網50」呢單嘢仲有排搞,相關股份自然動彈不得。而「接班人」增持相關股份後,坐到一褲都係,暫時唔見得相關股份可以變現或有任何炒作,接近年尾,各證券行要埋數過年,亦會睇緊啲盤數,有傳聞指「接班人」被追孖展亦合情合理。

查實,要知一個人周轉有無出問題好容易,好似九頭身美女嘅男友、大夫等,喺缺水情況下,首先都係先按股票度水,股票按無可按,就按磚頭或賣磚頭,而最新消息係「接班人」旗下物業,已經全數按晒畀大型財仔。

搵得財仔做按揭,通常都唔會係首按,至於係第幾按,阿Man就唔多清楚,只係知道按到盡嗰款。

老友八畀阿Man知嘅時候話,「接班人」按樓應該就快有周轉問題,就快賴嘢,阿Man即反問老友,既然樓已按,唔係未來式嘅「就快賴嘢」,應該係現在進行式嘅「賴緊嘢」,或者過去式嘅「賴咗嘢」……

麥狄文(徐狄怡.證監會持牌人)

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads