熱門:

2018年6月25日

方卓如 方如玉帥

小心瘦牛食咗隻肥牛

世界盃分組賽接近打完第二輪,雖然歷史證明,用elimination方法曾經成功預測邊一隊係冠軍,但係現代足球唔再純情,並非邊隊好波就邊隊贏。有埋VAR視像裁判,球證要影響賽果可以更放心,因為冷氣房還有幾個球證幫手做證,唔吹雞,吹錯雞,責任都不在球證。但有VAR出現,入球多咗,十二碼唔會走漏,過了白界又唔會誤判。不過,單憑邊隊入波多,就覺得有霸氣,你咪要貼英格蘭係冠軍?

照而家睇,西班牙同葡萄牙邊隊首名出線,邊隊有着數,因為條下線完全冇強隊。主觀願望決賽係葡萄牙對巴西,呢場戲碼肯定係收視冠軍。C朗如果攞埋世界盃,證明足球仍可以靠一人之力扭轉形勢,唔再必然係靠戰術或整體,咁先至可以保持足球嘅浪漫,你亦可以見證最後一個球王誕生。

小米上市每手4444元,坊間話邪門、唔老嚟。查實佢哋不知幾醒,一手4444元,兩手咪8888元囉,小米就係要提高一手黨成本,最少要你買兩手,好意頭。

小米孖展冇預期咁踴躍,可以令少啲人輸利息。要知道月底市場銀根短絀,又要借到7月頭,利息特別貴。而家散戶傾向用現金唔借孖展,反而有機會賺錢。要知道,垃圾股可以升,估值超貴股可以升得更貴,短期市場價錢可以受人為操控。你用8888元去抽兩手,第一日是可以贏錢。只不過,8888元,賺一成都只係888元,扣埋使費,未夠買部小米手機,是否值得,自己考慮啦。

過咗6月,新股就要唞唞,五窮六絕七翻身,究竟7月是否可以反彈?據報A股市場有6萬億股票抵押,但監管機構唔俾大額質押股票斬倉平倉。唔俾斬倉平倉唔代表股價唔跌,只係望住股價一路跌,券商自己一路蝕。

質押嘅大額股票唔俾沽,惟有搵第二啲股票沽,否則大市同聲下跌,券商一手蝕本貨。斬倉一向都係股價暴跌元兇,A股唔俾平倉斬倉證明A股市場有暴跌危機,而家其實係當年暴力救市嘅翻版,唔俾你沽同要你入市基本上一樣,只係入市可能賬面有得贏,但唔俾沽就輸梗。

香港頂到而家都未加息,只怕將來要加嘅時候,就係最壞嘅時候。香港貨幣政策跟美國,經濟同股市表現跟中國,如果兩者各行各路,香港在中間被兩邊拉扯,仲唔五馬分屍?中國受貿易戰影響,人民幣要貶值;香港最終要跟美國加息,港元要升值。但當香港周邊地方全部銀紙貶值,唯獨是港元升值,到時只有資產價格下跌。到那一天來臨,全部首置嘅香港人上咗車,上咗車先嚟加息同資產價格下跌,好傷。

美國加息收水對新興市場影響逐漸浮現,貨幣貶值是最明顯的第一步。香港頂住咁耐好似冇乜事,歌舞昇平,但聖經都有七隻肥牛同七隻瘦牛嘅故事。香港呢隻牛肥咗咁多年,係時候小心瘦牛出嚟食咗隻肥牛。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads