熱門:

2018年5月29日

方卓如 方如玉帥

白武士嘅武功將會失傳

香港人買樓幾貴都肯買,係因為買樓可以守。首富成日都講,如果你買嚟自住,又計到數,唔怕買。因為佢肯定層樓20年後唔會唔見咗,期間就算跌得幾甘,有朝一日必定升穿你買入價,九七至今係一個實證,只要你守到,未見過買樓會輸錢。股票就沒有這個福分,而停牌18個月就除牌,更加令股票變成冇得守。冇得守嘅資產,你唔可以抱有僥幸心態,隨時要有止蝕準備。其次係你唔可以全副身家放落去。買樓可以係你全副身家,但股票一定唔可以。

正因為冇得守,股票是否有殼嘅概念,要調整一下。殼股如果冇長期存在嘅基礎條件,仲可以叫什麼殼?早前曾被點名DQ嘅公司,如果唔能夠逃離DQ名單,還可以成為殼?正因為殼有殼價,所以股票變成了有最底價,市價點都值幾億。但近一年已經見唔少股票,股價(同市值)跌到殼價都不如,未來將唔會係個別情況,普遍嚟講唔再會有「至少值番個殼價」嘅市值出現。股價低處未見低可以是新常態,唔再有低於殼價,值得少注博升幅嘅必勝方法出現。

按殼生意成絕響

殼價唔再係理所當然,連帶貸款都出現根本變化。按殼是一門生意,唔還錢啪殼以前仲係暴利生意。而家創業板絕少人肯按殼,未來連主板都未必有人願意。

停牌18個月要除牌,按殼嘅抵押品變成一堆廢紙,債主還未及進場了解情況,思考如何令公司復牌,避免血本無歸,轉眼夠鐘,除牌收場,結果是冇仇報。18個月,連同入復牌計劃,等問問題,等審批,萬一牽涉專業人士查數,提出補救方法,來來回回,轉眼就過,邊夠時間。停牌18個月除牌,其實一停牌就死得,唔相信有公司可以逃命。

最慘係唔會再有白武士出現。唔會有白武士可以在18個月內,完成晒入場、發股、削債、注資、激活、復牌嘅程序。以前白武士肯博,除了死殼價錢較平,最重要係有得守,那怕用上幾年時間,一朝復牌就連本帶利返來。而家冇得守,唔會再有白武士,死殼翻生成為歷史,白武士嘅武功將會失傳。

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads