熱門:

2018年4月16日

方卓如 方如玉帥

作客入球雙計

不知是那位天才發明,歐聯好睇嘅原因係有作客入球優惠,香港譯做作客入球雙計更加到肉,令到主場球隊分分鐘輸一球要連追兩球,又或者落後嘅作客球隊追和就出線。

最經典係當年兩隊米蘭球隊,同用聖西路做主場,一場零比零,另一場一比一,但是一比一那場AC米蘭名義上是作客嘅一隊,所以由佢晉級,可見作客入球雙計嘅威力。嚟緊歐聯四強,我買利物浦入決賽。以佢哋而家嘅精神狀態,一場過嘅決賽,畀佢哋攞埋冠軍都唔係冇可能,香港嘅利迷有福了。

金管局買了近100億港元,大家望住銀行結餘幾時跌穿1000億元。息口高低是商業行為,銀行沒有理由抗拒高息,只係同業競爭,加上資金充裕成本唔高,先出現美國加幾次息,香港都唔跟。但係香港選擇了固定滙率同資金自由出入,利率就唔到自己話事,此乃教科書所講嘅三角關係。香港同美元滙價跌到了固定下限,利息向上是遲早問題,否則就破了經濟定律,成為世界首例。

利息上升,邊班人最受影響?係博到盡向發展商借錢買樓嘅一班。佢哋頭兩、三年享受發展商提供嘅低息,博樓市升值,到期後可以問銀行做按揭時借多啲,同買入價比就變成了高成數按揭。佢哋唔係同發展商對賭,係同市場對賭。萬一樓價下跌,佢哋到時搵銀行轉按,變相要多付首期,恐怕唔係咁多人能夠應付。

就算樓價冇跌,畀佢哋做到銀行按揭,享受慣了發展商低息,甚至供息唔供本,突然間每月供樓支出大增,相信有準備嘅人唔會係多數。

萬一加息嘅環境仲影響埋股市同實體經濟,孭了一層博到盡買返嚟嘅樓,可以係好多人背上嘅最後一根稻草。

香港沒有利率主場,永遠都係作客。作客入球雙計,美國加一厘息好似對股市樓市冇乜影響,但係香港加一厘息就唔係好事,至少一班博到盡買樓嘅人就計唔掂數。

香港要捍衞聯繫滙率唔會係冇代價,20年前未能讓港元貶值就令到經濟沉了好幾年,今次再要捍衞聯繫滙率,代價如何,而家冇人知。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads