2018年3月20日
毛記(01716)上市超額認購邁向3000倍,是很值得研究的課題。
瘋狂的超額倍數,證明市場非常受落,很喜歡。但毛記嘅本質絕非監管機構喜歡的類型。還記得什麼七宗罪嘛?簡單嚟講,輕資產,容易賣殼,呢類稱之為啤殼嘅公司,監管機構最唔鍾意,直情想趕你走,唔好上市。毛記資產輕盈剔透,只要腦細一聲拜拜,一間公司就即刻變成軀殼,一乾二淨。
上市第一日追入
你橫睇掂睇,腦細九十歲時都唔會變成誠哥,同你講為你增值了1500倍,亦唔會話就算明天佢走去旅行,公司都會一模一樣。一間具備殼股嘅各種條件,超額邁向3000倍,投資者就是喜歡這類公司,監管機構是否要順應市場,唔用奪去投資者所愛?
毛記生意盈利下滑,錯過了業績高峰期,反而造就佢細細粒容易食。投資者眼見佢風光暫時不再,繼續支持,證明生意是否永遠向上,並非買股票最重要考慮,股價向上才是王道。同時間證明,監管機構最近DQ生意太細公司,要將佢哋除牌,並不一定為股東着想。生意下跌嘅公司股票都有人搶,生意見底,數字少無可少嘅公司,仲唔係撈底嘅良機?準備除牌搞到股價下跌五成,低價浮游反而仲有得博升上水面嘅機會。投資者既然睇股價唔係同業績掛鈎,咁用業績嚟除牌未必係對投資者最有利。
毛記最大嘅贏錢方法,唔係頭槌飛,係上市第一日追入。賓仕(01705)集資額仲多過毛記,最高可以升近8倍。毛記有希瑪(03309)同賓仕兩隻股票嘅前車,有貨嘅第一日早上都唔會沽,要炒上更加係易如反掌。公開認購反應咁熱烈,唔會話你冇公開市場,炒上5倍都唔會停你牌。而家最有爆發力嘅新股,唔需要全配售。細細隻,知名度高嘅主板,係賺錢最容易嘅新玩法。你女朋友嫌你冇樓唔肯同你結婚?你同佢講你有辦法攞到毛記placing,我保證佢點都唔會聽誠哥講搵第二個。
訂戶登入
下一篇: | 移民英國的日子 |
上一篇: | 「滬港通」及「深港通」上日收市統計 |