熱門:

2018年1月29日

高仁 財圈識真假

揭露「賊投行」引君入甕策略

有時候,高仁會以飯局對話系列形式探討財技,目的是以最輕鬆及「過癮抵死」方式,讓各位「巴打」有嘢(財技知識)落袋。在接下來的幾個星期,高仁會以飯局形式撰寫「蠱惑的唉賓」系列大爆內幕,本文將會揭露「賊投行」引君入甕策略。

另外,高仁還在準備撰寫「無間道IR」或「民企老闆『勵志』故事」兩個系列,以揭露相關的故事。如果各位「巴打」對上述哪一個題目感到興趣,請發電郵告知高仁。

在披露對話實錄之前,請各位「巴打」重溫人物背景,簡介如下:

戴孤劃──又稱為「戴Sir」,《信報》「蠱壇辨虛實」專欄作家,上市公司大股東,經常欺壓小股東;

程更計──本地證券行經紀兼財務顧問,除了招呼散戶之外,亦向上市公司出謀獻計;

鍾國通──中資投行「唉賓架」,熟悉中國國情。

高 仁:戴Sir、阿程,我為你哋介紹一吓,呢位係中資投行「唉賓架」鍾國通。

程更計:(細看對方名片)鍾生嗰間係「正氣」大型中資投行嚟喎,應該好過你哋某個「賊」行家多多聲啦。

戴孤劃:阿程,乜又有「賊投行」咩!?(高仁註:詳見2015年7月〈「賊投行」掉頭騙民企〉及2015年8月〈「賊殼主」夥「賊投行」做世界〉兩篇文章)

高 仁:呢間中資「賊投行」嘅「唉賓」經驗老到,喺香港股票市場打滾咗好耐,好識得serve啲客仔。佢哋會先同民企老闆混熟,哄你入局,之後至慢慢嘆。

鍾國通:講得冇錯!我見過有一家內地民企發行CB,換股價溢價約30%,票面息率8厘,IRR有12厘,主要目的係用新債嚟冚舊債,驟眼望落去,CB條款都唔算太差嘅。但當我見到認購人係「賊投行」行家,就即刻打個突,知道係「引君入甕」策略。

購CB不付款 民企頓缺水

程更計:我聽其他行家講,「賊投行」簽咗合約之後,居然敢唔認賬,唔肯過數住,民企老闆都吹佢唔漲。哈!哈!

戴孤劃:Tell me why?(高仁註:戴Sir點解突然間講英文嘅?)

高 仁:原因好簡單,「賊投行」喺認購協議加入咗N咁多項先決條件,其中部分條件嘅主動權完全落喺「賊投行」手上,例如要信納KYC(Know Your Clients,了解你的客戶)、反洗錢等等嘅DD(Due Diligence,盡職審查)。

鍾國通:「賊投行」就係要拖住筆數,令到民企缺錢變得非常水緊。因為「賊投行」知道有筆舊債即將到期,如果「賊投行」再唔過數嘅話,民企就要(向舊債主)支付違約利息。

戴孤劃:嘩!民企老闆咪好慘囉。What can he do?

程更計:(心想戴Sir講咁多英文,應該有啲問題)據講,老闆惟有直接踩上「賊投行」追數,但「唉賓」仲貓哭老鼠假慈悲……

高 仁:好啦!好啦!呢個故事愈講愈吸引,不如大家都飲啖茶、食個包,唞一唞先再講。

(飯局未完,下周待續)

「蠱惑的唉賓」系列.之一

本欄逢周一刊出

如想與高仁交流上市公司的財技個案及招數,請電郵至 [email protected]

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads