2022年6月14日
網紅界人氣第一,正皮、負皮(負評)無關重要,一味追求嘩眾取寵,愈誇張愈多like,廣告收入也愈多。搵食為大,但大極都要有譜,牛皮吹太大都會爆,亦要謹記「畀面派對」的道理,你happy、人家happy,才能和氣生財。
最近,3件KOL踩入某餐廳試食,彈三彈四、腌臢聲悶。鋸牛扒像咬中皮鞋,切羊扒像聞到夜香,面容扭曲、粗口橫飛,浮誇與刻薄程度比得上星爺飾演的食神。如果香港娛樂圈有「錢」景的話,大概會是電視台的小生,實在生不逢時、埋沒演藝細胞。
戲劇效果頂呱呱,過去多家食店慘遭劣評,但這次卻遇上騎呢老闆,報警兼要求道歉。KOL的誇張演繹方式,換來老闆同等誇張的反擊,實是最佳嗌交對手;正所謂你唔畀面我,我亦毋須畀面你,你令我生意做不成,我亦不讓你有安樂日子過,網民不愁無花生食。
公道點講,餐廳環境確實有待改進,煎牛扒水準、味道等見仁見智,也許偶爾出現失準,恐怕也不至於如此差勁?最唔畀面之處,在於KOL在店內細聲評、大聲笑,彷彿上拳館笑人三腳貓功夫,這不等同踢完館兼拆人招牌嗎?點可以忍啊?
求財亦需有品,你追求影片的點擊率,難道就可以打爛人家招牌?一家食店頂得住新冠疫情的摧殘,證明有一定的實力和生命力,其他店內食客情何以堪?該餐廳的扒選料不失禮,其他顧客正吃得有滋有味,看完短片不禁懷疑起味蕾與人生。
若論最腌臢的食評人非蘇施黃莫屬,她本身煮得一手好餸,也是食家,但她不忘尊重師傅與食店,鏡頭面前總會畀幾分薄面。這不是夠不夠膽、敢不敢言的問題,而是做人處世應有的修養;若然過去沒學會,就要其他人代勞,難免要交學費。
訂戶登入