2022年6月1日
姑勿論你幾鍾意珍珠奶茶,一次過飲兩杯加大裝,也不會爽過飲一杯,更有飽到嘔的風險。「Scarlet,近排真心煩,直頭人都癲!」表妹午夜3點向我訴苦,作為表姐的我無論出於關心抑或責任,也該用心聽聽。
表妹自小人見人愛,有幾分似南韓國民妹妹IU,中學階段已不乏裙下之臣,但父母家教極嚴,直至大學才初戀,不夠半年就被棒打鴛鴦。畢業後,她似乎想補償心理損失,把「收兵」變成習慣,種類繁多,如今被之前負責接送的運輸兵苦纏,「半年前已經叫佢唔好搵我,佢仲不斷騷擾我,連朋友、同事都收過佢電話!」她不敢向父母求救,唯有找我商量如何是好。
表妹轉寄了多幅對話截圖,令我大開眼界,例如他今年想約情人節食飯被拒,便神回一句「知你份人係咁,好就夏迎春,唔好就鍾無艷」。留意到對話時間,表妹已經多次「已讀不回」,兼且會隔半日才回覆,問題是前度依然死纏爛打。
猶記得表妹之前提過,運輸兵表面上官仔骨骨,不介意同其他男生競爭,但相處日久,發覺他有「一秒跳掣」的現象,經常無厘頭火山爆發,有時明明其他人態度並無不妥,他在平行宇宙也會覺得人家囂張跋扈,於是他便會歇斯底里、怒氣沖天,令身邊人患「尷尬癌」。
成日聽到男人話,不是每個女人可以flirt,其實男人又何嘗不是呢?表妹什麼方法都試過,上個月連續多日不回短訊,他居然找同事和朋友,「為免閒言閒語,唯有繼續覆佢短訊,但真係沒完沒了」。
老老實實,我沒有解決辦法,只可盡能力安慰一下表妹,然後躺在床上思考人生。
女人同時買N個手袋,肯定會興奮過買一個,興奮指數卻未必是N倍遞增,凡事真是要適可而止。
訂戶登入
下一篇: | 凝固為患 |
上一篇: | 如何完成一個「我」? |