2020年12月17日
巴黎聖日耳門球星尼馬成日做滾地葫蘆,不過喺大時大節之前假滾會變真傷,以便全心投入節日氣氛。上場聯賽0比1不敵里昂,補時階段就被泰亞高文迪斯以鉸剪脚整傷足踝,一路拍地一路大叫,聽講仲流埋馬尿添,最後要瞓擔架出場;真係傷在你身,痛在fans心啊!
達聞西知佢啲蠱惑嘢,但都畀佢嘅演技呃到,加上周中對羅連安特缺陣,都擔心佢有排唞,點知教練杜慈話希望周末對里爾可復出!咁即係話傷勢無大礙,最多係為安全計歇冬期後先復出,以最佳狀態出戰歐聯十六强對巴塞隆拿。
尼馬都喺社交網站報平安話好幸運, 唔好彩嘅話後果會好嚴重。咁即係又係冇嘢啦!呢位好蒲、爛滾、沉迷打機嘅球星,可以乘機hea番一排,腳傷康復剛好係歇冬期可以狂賀聖誕。大家話,尼馬係咪唔遲唔早,傷得啱啱好呢?
佢就傷得過癮啦!巴西同鄉泰亞高文迪斯就慘啦,佢同女友慘遭網絡恐嚇,有網民留言:「你男友都好事多為啦!尼馬有咩三長兩短,你同你嘅屋企人,會逐一命仔不保!」嘩!呢啲真係網上恐怖分子,法國警方快啲繩之於法啊!
點解網民情緒咁激動?咪就係有人小事化大囉!尼馬爸爸事後喺社交網站寫道:「X!呢次要傷幾耐?我哋强調過好多次,要關注暴力足球!尼馬一落場就有暴力,唔可以再助長歪風!」係喎!究竟尼馬係特別容易受傷嘅人,定係對手特登暴力對待佢呢?
踢人者收死亡威脅
上述問題好複雜,睇嚟要問番尼馬最清楚啦!達聞西重溫個犯規動作,覺得泰亞高文迪斯出脚係兇狠啲,不過談唔上係暴力;足球難免踢踢撞撞,唔想有身體接觸嘅話,可以去打高爾夫球或者乒乓波,不過商業價值同名氣差好遠啦!
泰亞高文迪斯同尼馬都係鄉里一場,咩係茅波咩係插水,大家都心中有數,何必搞到死亡恐嚇屋企人呢?尼馬作為巴西頭號球星,應該拍段片呼籲以和為貴,叫網上暴民們收手,咁下次再對里昂,泰亞高文迪斯自然會腳下留情。
呢個世界就係咁,人前留一線,日後好相見,搞到人家雞毛鴨血,或者趕狗入窮巷,最後蝕底嘅可能係自己都未定。
放大圖片 / 顯示原圖訂戶登入