唔好以為跌市先令人恐懼,升市都可以好得人驚。2018年到而家一個月唔夠,股市升到唔識停,升四五百點,成交千幾億,已經成為新常態。升得咁急嘅市況,好多人呆咗,唔知買好定沽好。最賺錢嘅,係焗買嘅專業投資者,佢哋嘅工作就係愈升愈要追,不問價都要買。結果係佢哋賺到笑之餘,仲可以認叻。而家市場最啱大大注大大聲,又攞彩又贏錢。
股票成為2018年開局嘅最佳投資,加密貨幣就係2018年開局最差投機。加密貨幣冇佢嘅投資價值,但個別有佢嘅使用價值,愈多人用,佢嘅價錢就愈高。如何做一隻多人用嘅加密貨幣,係未來嘅重點。當柯達都做自己嘅加密貨幣,代表傳統公司見到這種代幣有佢嘅用處。另一方面,貨幣買家又會見到代幣有其用處,唔係齋炒。大亂然後大治,大炒一輪之後,汰弱留強,剩番嘅就會在市場找尋自己嘅位置。
加密貨幣必須「落地」
未來值錢嘅加密貨幣,一定係落地嘅,同日常生活有關。Facebook同Telegram要發自己嘅加密貨幣,唔係純炒,係可以用在大量用家嘅基礎上,當市民接受咗加密貨幣嘅參與模式,就唔單止係泡沫。今年你會見到更多監管,更多傳統公司做幣,更多意想唔到嘅用途。投機嘅情況,今年內一定完結,淘汰剩嘅,只會係有價值嘅代幣。
下一個殺入加密貨幣嘅,係傳統基金。ETF開始蠢蠢欲動,遲早有日會放行。基金可以投加密貨幣,基金嘅背後亦可以變成加密貨幣。Crypto會由科技人主導,變成由金融人主導,科技人又變番服務金融人嘅崗位。
今年會係科技人參與加密貨幣賺大錢最後一年,之後就會由傳統金融人食最大個餅,由佢哋聘請科技人為自己服務。科技人一係快手推出新項目,一係就泊個金融人,令自己可以長遠分一份。