恒生指數昨天跌356點，成交1699億元，跌市唔使找原因，升得多自然要跌番啲，就算跌到30000點，高位跌足一成，都仲係港股嘅高位，唔代表市場由牛市變熊市。昨日其實係開市跌完升到尾，十分硬淨，離恐慌性拋售甚遠。個別細價股仲毋懼跌市，繼續開車，唔好咁快諗住大跌，沽定先，而家仲未出現玩完嘅訊號，只要記住trader嘅守則，當你有新嘅資訊在手，你要毫不猶豫打倒早上的你。
股票跌得未夠多，加密貨幣跌得先狠。比特幣（Bitcoin）跌穿8000美元，以太幣（Ether）跌穿800美元，咁嘅跌幅，足以讓任何人說泡沫爆破，玩完。
加密貨幣其實同細價股一樣，接近沒有內在價值，純粹炒供求。細價股可以跌九成，然後等除牌，加密貨幣向大跌九成進發，只係唔會停牌，但唔排除被另一隻更好嘅加密貨幣取代。究竟而家嘅水平，應該點處理加密貨幣？我相信係膽識同財力行頭，市面上唔夠資訊作理性分析，你唔知幾時全世界要把加密貨幣當作毒品看待。
無論比特幣點跌，區塊鏈（Blockchain）係唔會消滅，一定會有唔同嘅應用層面。貨幣只係其中一個應用，區塊鏈能夠以完全沒有貨幣嘅形式出現，未來監管更加清晰嘅時候，任何資產都可以代幣化，將你間屋斬件，你佔六成，繼續住，但係其他人可以享受四成升幅，仲可以自由買賣。
你層樓變成代幣之後，你可以帶佢四圍走，等錢使嘅時候，搣少少出嚟找數（唔使套現，因為屆時加密貨幣可以作交易）。互聯網係資訊高速公路，而區塊鏈就係資產高速公路，你可以將資產自由流動。未來肯定有更多資產代幣化嘅項目，而且係好平常嘅事，人人可以自行參與。
30年前，最大嘅幻想係人人枱頭有部電腦；20年前，係人人可以上網；10年前，係人人手上有部電腦。今年最大嘅幻想係任何資產可以代幣化，自由買賣，四處流動。如果30年以來的幻想全部都可以實現，今天嘅幻想其實唔太天馬行空，非常接地氣。早入場嘅，一係發大達，一係粉身碎骨，問題係，同一時間入場嘅，冇人可以保證你開邊瓣，我惟有選擇用半身早入場，假如真係粉身碎骨，還可以用上半身食飯。
