近年港人悲觀情緒升溫，有意見更擔心香港的國際金融中心地位遲早不保，社會對此好淡爭持。上市公司商會主席梁嘉彰（Catherine）傾向樂觀，「（新冠）疫情有朝會處理到，一旦香港行返出嚟，有好多好好嘅機遇：大灣區、北部都會區……年輕人有祖國喺後面，可以揀喺北京、深圳、香港做嘢，不同板塊都有synergy（協同效應），但你要接受新環境。」這位傑出女投行家如是說，別具鼓勵作用。
身為摩根大通（亞太）前董事總經理，Catherine事業成就毋庸置疑，今次她並非分享奮鬥史，而是向年輕人提供意見。她認為現世代的機遇遠較她那一代多，以投行為例，「data scientist（數據科學家）、AI specialist（人工智能專家），做user experience（使用者體驗）嘅design……嗰陣我哋邊有？畢業出嚟，做財經定律師、會計？得幾個板斧。」
「而家百花齊放，科技發展、內地行得咁快，只要你有胸襟，好多嘢可以做。」惟她忍不住慨嘆，港人似乎看不見相關機遇，亦不太願意積極裝備自己；直腸直肚的她不吐不快：「我長期喺金融市場做嘢，有我嘅體會；係咪似老人家咁嚕囌呢？哈哈。」
事實上，梁嘉彰一向熱心支持青年發展，曾任香港科技大學校董會、發展委員會、常務委員會及顧問委員會成員，2018年獲科大頒發榮譽大學院士；2016年她與夥伴發起科大HeadStart卓越領先計劃，以大一、大二學生為對象，「我成日同學生傾偈，佢哋好多係（家中）第一代大學生，即爸爸媽媽唔係，亦較基層，但好勇於接受同嘗試。」
兒子留學美國前北上實習
Catherine認為，部分港青對國家有負面印象，只因缺乏認識，故HeadStart計劃的實習部分，她特別着重為學生提供到內地試練的機會，「落地體驗、親身感受，而唔係由人哋話你聽；班後生仔返到嚟同我講好開心，只要有人開頭，畀多啲機會後生仔去，自然成行成市。我唔係得個講字，係落實做，因為呢樣嘢對香港非常重要，同政治無關，係（年輕一代）前途問題。」
「我哋嘅青年人其實好smart，好有諗頭、創意，不過有時會諗埋一邊，你好難convince佢哋『喂條路咁行好啲喎』，佢可能有意見，係被身邊朋友或者唔知邊個影響，會有啲固執，但只要令佢哋眼界開返，open minded啲，根本very talented。」
如此關心港青前途，因她也有兩名子女；21歲長女跟她一樣就讀美國賓夕法尼亞州大學沃頓商學院，今年畢業後會於加州矽谷任職投行，將來隨時變成「梁嘉彰2.0」；18歲幼子8月將負笈美國讀物理，升學前夕，Catherine先安排他暑假到內地一家半導體企業「無償實習」，「佢都話一定要去，要認識祖國；我哋family都知（未來）機遇喺大灣區，普通話一定要講得好、寫得好，同埋融入個文化。」
Catherine直言這番話未必人人受落，但全屬由衷之言，「尤其香港現在情況，國家更想香港integrate into（融入到）大灣區，中美關係（緊張），（國家）點會唔好好利用香港呢個資本市場？」
「近年好似無乜聲音話上海同香港爭呢樣、爭嗰樣，若干年前我哋會聽到『香港就快輸畀上海』，而家（國務院副總理）韓正講得好清楚，香港（發展）係兩件事：國際金融市場、國際創科中心。」
借鑑以色列創科突破圍堵
疫情前，Catherine常到以色列出差，很欣賞當地創科風氣；該國本身缺乏自然資源，周邊國家又不友善，只能透過創科達致自給自足，現時以色列在網絡安全、雲計算、金融科技等均擁有頂尖技術，「佢哋個can do attitude（可做得到的態度）好有啟發性，無嘢係唔得，佢哋唔止聰明，仲好有前瞻性、毅力，民族性強。」
她認為香港未來充滿機遇，港人應借鑑以色列人「敢於嘗試」心態，這份信念促使她去年6月出任上市公司商會主席，「有少少使命感，想推動多啲香港善用優勢，主動爭取對我哋有利嘅嘢。」她透露商會有兩大重點方向，包括在氣候變化問題支持政府工作，鼓勵市場更關注ESG（環境、社會及企業管治），以及支持香港金融市場和大灣區高科技發展。
本地疫情仍然嚴峻，惟Catherine形容，與以色列人相處，令她明白做人要向前看，「而家好多黑雲喺前面，你想沉可以好沉，但你要睇穿啲黑雲，知道有陽光喺出面，等多段時間就會（投射）入來。」她思想樂觀豁達，大概也受其父母影響，「佢哋係好硬淨嘅人，所以我細細個已經係咁，有問題就要解決。」
到她身為人母，問Catherine對子女有何期望？「善良同有韌力！要相信自己；做人點會無低點（潮）？在於有幾多同幾低，關鍵係你點樣面對去爬番起身，只要你善良、肯幫人，始終會雨過天晴，我信呢樣嘢，雖然我無宗教。」
機會不等人，正如提出「進化論」的已故著名英國生物學家達爾文講過：「機會是每個人都有的，但許多人不知道他們已碰到它。」
採訪、撰文：吳永強、許鎮邦
圖片：被訪者提供
