2020年8月1日
新冠肺炎疫情未受控,準買家睇樓意欲不大如前。3間主要代理行統計周末兩天(8月1日至2日)的預約睇樓量齊齊錄得4周連跌頹勢,個別更按周急挫逾一成六。
中原地產統計的十大屋苑,周末共錄342組客預約睇樓,創5個月新低,較前一個周末(7月25日至26日)再減16.4%,當中鴨脷洲海怡半島重災,周末預約睇樓量跌至險守雙位數,由前個周末共40組勁縮75%,至僅10組。事實上,該行統計的十大屋苑周末預約睇樓量,自7月11日至12日該周末起已連續4周走下坡,反映疫情惡化,準買家傾向推遲睇樓計劃「避疫」。
肺疫未受控 嚇窒準買家
不過,中原地產亞太區副主席兼住宅部總裁陳永傑相信,樓市基調較穩,市場對樓市取態普遍仍樂觀,後市取決疫情發展,倘短期內受控,樓市將急速反彈。
美聯物業統計的15個屋苑周末預約睇樓量也出現連續4周下跌情況,最新一個周末錄331組客預約睇樓,按周減少8.1%,港島區表現最淡,包括鰂魚涌太古城在內的3個屋苑合計預約睇樓量僅66組,按周勁跌24.1%。
美聯物業住宅部行政總裁布少明謂,置業剛需強勁,不少準買家仍積極探市,欲趁疫市執平貨,倘若業主願意擴大議幅,二手承接情況仍樂觀。
利嘉閣地產研究部主管陳海潮表示,受疫情及限聚令影響,買家態度觀望,加上周末天氣不穩,令預約睇樓量受壓。該行估算,50個指標屋苑周末錄1075組預約睇樓,創近23周新低,按周再減4.9%,連跌4周。
訂戶登入
下一篇: | 波斯富街舖劈近七成租出 |
上一篇: | CCL三連升斷纜 料高位反覆 |