十大屋苑7天半數零成交
貿戰嚇窒買家 2030放盤「無人吼」

中美貿易戰愈演愈烈，二手私樓買家開始怕摸頂，無意追價入市，業主又不肯擴大議價幅度，拖累十大屋苑本月交投勁插水。統計十大屋苑共有逾2000個放盤，本月首7天只有約12宗買賣，其中一半屋苑零成交。將軍澳新都城及東涌映灣園更是連續10日零交投最慘情。代理直言，今年最旺市時平均每天「有十枱八枱客預約睇樓，但本月靜到試過全日得一枱，全條Team的同事幾乎坐晒喺公司」。

貿戰打窒買家入市意欲，但業主不為所動無意減價，令十大屋苑共約2030個放盤「無人吼」，即使周五端午節假期市場同樣未聞一宗買賣。

新都城映灣園10日捧蛋

其實，十大屋苑中的新都城已連續10日零成交，香港置業助理分區董事劉浩勤表示，新都城自上月28日2期6座低層B室屬實用面積364方呎兩房戶以648萬元易手以來，長達10天未再錄得買賣，屬該屋苑今年同期最靜。

劉浩勤坦言，「一下子成堆壞消息出晒嚟」，但新都城約有160個放盤，「之前反完價嘅唔肯減，啲客只係想要市價，但個個（業主）都嗌到好高」，以一個實用面積364方呎的細兩房為例，普遍業主索價680萬至690萬元，較市價650萬元，高至少約4.6%，「大部分仲要接近零議價或者1%至2%，想唔靜都難。」

劉浩勤補充，整個將軍澳6月首7天只有16宗買賣，以全區近600名代理計，「靠二手（開單）真係跪低，唯有之後等大盤開，去做一手。」

東涌映灣園同樣有近200個放盤面臨「有盤無客買」情況。美聯物業首席高級營業經理吳惠斌透露，全屋苑共約180個放盤業主，只有約2%願意減價，「而且所謂減，只係1%至2%，叫價直程硬過條鐵」，無疑令買家無意追入，直接拖累屋苑交投。

另外，觀塘麗港城上月價量齊升表現一枝獨秀，但踏入6月交投亦大插水。利嘉閣地產市務經理許嘉揚指出，今年3月最旺時「我哋行平均一日都有十枱八枱客預約睇樓，但本月靜到試過全日得1枱客，全條Team的同事幾乎坐晒喺公司」。而該屋苑目前有約60個放盤，但6月首7天竟仍未有一宗成交，對上一宗買賣屬5座高層C室，實用面積517方呎兩房，上月29日以800萬元售出，之後9天未見開單，「之前平均兩日都有一宗成交，而家真係踏入今年（同期）最靜時期。」

業主拒減價「唔憂賣」

許嘉揚解釋，現時中美貿易戰「係講緊大嘢，唔係普遍小事，啲買家早已卻步」，但麗港城「咁多盤」就只得一兩個業主肯減價，與買家預期有明顯落差，交投自然陷入膠着。

部分出價夠勇的買家才成功打動業主沽貨，如鰂魚涌康怡花園A座中層1室，實用面積710方呎，3房間隔，中原地產首席分區經理楊文傑說，原業主叫價1800萬元，最後有買家出價達1468萬元才成功購入，呎價20676元，除了屬今年該屋苑呎價最貴外，亦創該屋苑呎價第三高。原業主2015年以943.8萬元購入，賬面賺524.2萬元（約55.5%）。

美聯物業住宅部行政總裁布少明表示，自中美貿易戰惡化以來，不少準買家入市態度已轉觀望，而部分就想藉消息執平貨，「有啲一嚟就還10%，當然業主唔會接受」，導致交投陷拉鋸，預計短期內至少整體6月仍會維持交投冷清。

採訪、撰文：鄭達偉