熱門:

2015年2月18日

麥狄文 金融街密語

金融土匪打劫民企

沽空機構臨近歲晚又出擊,先有Emerson Analytics盯上嘅桑德國際(00967)作出反擊,復牌後再出澄清公告,進一步指控報告載有一連串毫無根據及荒誕不經的指控,根本完全沒有可信性。至於被Glaucus Research質疑誇大集團收入及盈利嘅浩澤淨水(02014)則仍然停牌,聽聞該公司已部署反擊,皆因報告所質疑之處全屬斷章取義,誇大失實。睇返浩澤上市保薦人為高盛,所用核數師亦係Big4之一嘅E&Y,咁嘅陣容斷估冇咁兒戲會作假,呢舖即管睇吓Glaucus Research支魔笛吹唔吹得響。

近年呢幾間鬼子佬沽空機構可以話愈嚟愈猖狂,當中個朶最響係2011年掀起民企風暴嘅渾水研究Muddy Waters Research。渾水可以話專烚民企,3年前曾狙擊喺楓葉國上市嘅嘉漢林業,不僅搞到嘉漢冚旗除牌,拖累旗下喺香港上市公司綠森(00094)易手。跟渾水齊名嘅Glaucus Research,代表作包括成功狙擊前稱青蛙王子嘅中國兒童護理(01259),同埋去年指控旭光(00067)造假令其停牌至今。剛剛瘋狂狙擊桑德嘅匿名分析(Anonymous Analytics)亦曾唱衰超大(00682),令其停牌超過3年。至於香櫞研究Citron Research,則因為唱衰恒大(03333)被證監開刀,恒大亦因此得到平反。

無本生意 愈來愈猖獗

上述幾間沽空機構,搵食方法不外乎先沽空目標股份,再出報告唱衰公司,令其股價大幅插水,最終喺孖展補回平貨冚倉,達至圖利目的。諗深一層,證監直至恒大事件才向沽空機構開刀,似乎過分仁慈,沽空機構為求一己私利,刻意敗壞個別上市公司聲譽,攻擊集團大小股東利益,製造恐慌及操控證券價格等舉動,完全屬於造市行為,阿Man唔明證監點解唔嚴正對待。

個別沽空機構所作所為跟金融土匪冇兩樣,阿Man收到風呢班土匪之所以愈嚟愈大膽,全因呢門係無本生意。或者讀者會質疑沽空都要成本,何解係無本生意呢?

原來呢門生意最大成本就係搵人寫份唱衰報告,有ibank老友八話畀阿Man知,通常呢啲幾十頁一份嘅唱衰報告製成後,被唱衰主角會收到幾頁「預告篇」先睹為快,繼而就有中間人聯絡主角,唔少主角為咗息事寧人,都願意付出可觀代價買斷成份「劇本」,金融土匪袋袋平安,自然停止進一步行動。不過,部分公司認為自己行得正、企得正,堅決唔肯畀土匪明搶,寧願喺市場硬碰,與其一較高下。當然真金不怕洪爐火,只要公司有真材實料,交足功課,業績對辦,又何懼股價一時三刻之波動。

本欄逢周三刊登

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads