超大遇人不淑停牌多年

大家好，小妹麥狄文阿Man，從事金融工作多年，目前喺一間行事低調嘅中型投行打雜，由於工作關係，聽聽埋埋唔少關於金融圈內花邊新聞同小道消息，有幸在此執筆同讀者分享，由今日起《金融街密語》將會逢星期三同各位八一八，希望大家啱睇。

超大（00682）停牌三年幾終重見天日，復牌後股價插水難逃一跌，搞成咁係因為2011年9月被沽空機構「匿名分析（Anonymous Analytics）」質疑盤數有問題，即使超大董事會堅稱，指控「毫無真實性、且沒有事實根據，以及具有誹謗的成分」，但自報告發表當日起，超大足足停牌超過三年。其實被呢類沽空機構煮重米嘅上市公司又豈止超大一間，舊年「匿名分析」曾經唱衰天合化工（01619），連累該公司停牌個幾月，而2012年6月發表造空報告唱衰恒大地產（03333）嘅香櫞，更被證監會起訴報告失實，可見呢類沽空機構亦唔係咩仁人君子。

奇怪嘅係被呢類沽空機構唱衰嘅股份，一般停牌時間短則三兩日，長則都係一頭個半月或三幾個月，好似超大停咁長時間真係好少有。睇番超大其中一個復牌條件係需要發表過去幾年未公布嘅財務業績同報告，聽聞就係一直為咗呢個條件，拖足幾年都搞唔掂。

會計師不合作惟有換人

一般上市公司要發表業績報告，都需要由會計師核實，超大之前一直因為會計師唔配合，同公司管理層唔啱嘴形無偈傾，每年份業績報告遲遲未審批核實，復唔到牌唔可以入晒「匿名分析」數。直至三個月前，超大的起心肝換咗個會計師，卒之計掂條數成功復牌。雖然該公司過去三年累蝕過百億相當驚人，但係復到牌、保住上市地位總算執返身彩。

阿Man同大家分享超大呢單料，係想大家明白上市公司除咗管理層質素好重要，其合作團隊亦發揮重要效用，包括財務顧問、會計師同IPR等等，每一單位都需要有默契合作，上市公司呢個集資平台先可以物盡其用，是但一瓣搞唔掂，呢台「印鈔機」等同無墨水，難以發揮其集資功能。

本欄逢周三刊登