《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2014年12月8日
上文提要：高仁與「豬朋狗友」戴孤劃及程更計一起飯局，討論到要成為殼王、殼后或殼主的條件，可能要靠蠱惑必殺技幫忙，即以暗手股票壓低股價，達到收殼的目的。
程更計之後提出，他懂得大股東抵押股份而不讓街外人知道的好方法，戴孤劃聞悉大悅，即時獎賞一碗天九翅「漱口」，期望可以獲得大股東押股借錢的蠱惑招數。
在披露對話實錄之前，請各位「巴打」與「絲打」看看人物背景，簡介如下：
戴孤劃──又稱為「戴Sir」，《信報》「蠱壇辨虛實」專欄作家（高仁按：戴Sir要求賣「廣告」），上市公司大股東，經常欺壓小股東；
程更計──本地證券行經紀兼財務顧問，除了招呼散戶之外，亦向上市公司出謀獻計。
程更計：天九翅果然係「零舍不同」！
高仁：你好似返番去70、80年代，嗰啲魚翅撈飯嘅日子咁喎。
戴孤劃：阿程，翅你就食完嘞，可以講得未呢？
押股要登記及披露
程更計：其實，大家知唔知道，大股東押股借錢嘅話，需要做啲乜嘢手續？
高仁：視乎抵押畀邊個啦，如果唔係qualified lender嘅話，大股東就要將啲股票做抵押登記，仲要作出披露。
戴孤劃：係啦，麻煩到死。
程更計：大股東透過CCASS【小檔案】參與者持股去做抵押，「財仔」通常都會要求將抵押咗嘅股票做轉倉。
戴孤劃：如果係紙質股票（實物）嚟，咁又會點做呢？
程更計：「財仔」通常會要求大股東交出手頭股票，但就唔會攞去做轉名手續囉，但有啲做事較小心嘅「財仔」，可能會要求大股東去過戶處，將手股票一分為二，以證明股票嘅真偽。
高仁：揸住紙質股票當「牆紙」咩，要trade起上來咁麻煩。
程更計：所以，大股東通常都會搵人頭代持股票，股票corner晒夠乾身，方便股價炒上去，但每名人頭唔會揸超過5%。
戴孤劃：點解？
高仁：股東揸超過5%股權，「花紙」【小檔案】要披露嘛。
戴孤劃：老老實實，阿程我覺得你呃咗我碗天九翅囉，你講咗咁耐都未講到「戲肉」喎。
程更計：我啱啱咪講緊搵人頭代持股票嘅，咁就當然要好好利用呢啲人頭啦。
人頭押股或擔保借錢
高仁：又用人頭，咁你都諗得出！？
程更計：我仲諗咗兩個方法。
戴孤劃：快啲講嚟聽吓。
程更計：第一個方法係用人頭嘅股票去抵押借錢，而由大股東作為借款擔保人，借款輾轉畀返大股東用，咁大股東咪唔使披露囉。
戴孤劃：大股東無端端幫人做擔保，點解釋先？
程更計：你可以話，人頭買咗你公司啲股票，之後等錢使又唔想賣出，咁你咪幫手做個人擔保。
戴孤劃：呢個好橋喎。
高仁：阿程，你快啲講埋第二個方法畀戴Sir聽啦。
程更計：好！第二個方法係大股東向「財仔」借錢，但就用人頭嘅股票做擔保，咁大股東咪一樣唔使披露囉。
戴孤劃：今次又點解釋人頭嘅股票來源先？
程更計：你咪話人頭係你啲friend囉，朋友拔刀相助，有乜咁出奇啫。
戴孤劃：咁又係……
程更計：戴Sir放心喎，呢兩招都有大股東用過，真係work喎。
高仁：不過，我見到你呢兩招都係用人頭做，公司股權一定唔可以太過集中，否則，做起上來會有難度。仲有，人頭持股係關連交易，始終唔係太合規。
程更計：當然，上市公司股權表面上分散，實際上會有好多人頭揸住，股票可以乾到無輪。
戴孤劃：咁就好，就算我第日要押股借錢，都可以用呢兩招去做，唔使咁麻煩兼畀街外人知道。
高仁：戴Sir睇嚟都幾滿意咁喎？
程更計：我食嗰碗天九翅值回票價啦。哈哈！
本欄逢周一刊出
歡迎交流上市公司的財技個案及招數，請電郵至[email protected]。
小檔案
CCASS
意思：Central Clearing And Settlement System，中央結算及交收系統
「花紙」
意思：CCASS的股權分布報告
放大圖片 / 顯示原圖
訂戶登入
| 下一篇： | 政治無知投資怎會出色 |
| 上一篇： | 美元單邊造上 高處未算高 |
