《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2014年10月13日
華創（00291）的內地超市合營夥伴─英國最大型零售連鎖企業Tesco，涉嫌造數誇大2.5億英鎊盈利，高仁趁與一眾「豬朋狗友」飯局，上半場拆解了Tesco可能把收入提早入賬的財技，是次下半場再拆解如何把成本延遲入賬的財技。
在披露對話實錄之前，請各位「巴打」與「絲打」看看人物背景，簡介如下：
戴孤劃─又稱為「戴Sir」，《信報》「蠱壇辨虛實」專欄作家，上市公司大股東，經常欺壓小股東；
沈繼司──核數師，熟悉會計制度、對數字敏感，但對外面世界一無所知；
沈繼司：高仁，燒鵝左肶食完嘞，係時候再過我兩招嘞喎。
戴孤劃：（帶點輕佻口吻）哈哈，沈繼司梗係驚平時audit會瀨嘢啦。
高 仁：（再充當和事佬角色）咁沈繼司份人不嬲都好學不倦嘅。
沈繼司：Anyway，乜都好啦。
戴孤劃：高仁咁你就過佢兩招啦。
高 仁：OK，就等我講埋Tesco點樣可以將成本延遲入賬啦。
沈繼司：Thank you，高仁。
或涉自家廣告宣傳開支
高 仁：同一道理，如果Tesco喺10月推出自家嘅廣告宣傳活動，所牽涉嘅廣告相關開支例如1000萬英鎊，估計亦可以分為兩部分嚟睇，第一部分係一次性製作成本500萬英鎊，第二部分係每月2次嘅廣告推廣支出，合共亦係500萬英鎊。
戴孤劃：乜咁似頭先條數嘅？
高 仁：假設數字啫，只係方便大家比較。
沈繼司：Mmm……Tesco年尾埋單計數，就要把700萬英鎊（500萬英鎊 + 4 x 50萬英鎊）開支入賬喎。
高 仁：冇錯。不過，假如Tesco搞掂廣告製作商，將一次性製作成本改為200萬英鎊，每月2次嘅廣告推廣支出改為800萬英鎊，情況又可能會唔同晒。
沈繼司：一次性製作成本200萬英鎊，再加每月2次嘅廣告推廣支出320萬英鎊（4 x 80萬英鎊），即係總開支成本只有520萬英鎊，比之前大幅減少26%喎！
戴孤劃：如果Tesco一邊將收入提早入賬，另一邊廂又將成本延遲入賬，一來一回之下，怪唔之得可以誇大成2.5億英鎊盈利啦。
高 仁：講咗咁耐，大家知唔知道Tesco涉嫌誇大盈利呢單嘢，係由邊個揭發出嚟呢？
戴孤劃：係咪好似之前啲cases咁，沽空機構出report唱淡，然後去做公司世界？
沈繼司：好似唔係喎，今次單嘢係由Tesco嘅CEO Dave Lewis自行引爆，仲要通知埋英國嘅「watchdog」 Financial Conduct Authority，同埋律師事務所Freshfields配合調查，我都唔知對佢本身有乜好處？
戴孤劃：CEO做「二五仔」自行引爆仲要call in watchdog，我覺得一定有啲古怪，高仁係咪呀？
高 仁：戴Sir經常行走江湖，果然係老謀深算，我都係講嗰句，要怪只怪我哋嘅沈繼司太年輕。
（高仁按：其實沈繼司都已經40有2，我同戴Sir實際所指係其人生閱歷。）
沈繼司：OK，夠嘞，快啲解釋嚟聽吓。
新CEO明哲保身自行引爆
高 仁：你知不知道Dave Lewis背景先？
沈繼司：唔知喎。
高 仁：佢係Tesco第一位從外面空降嘅CEO，今年7月先走馬上任，佢之前喺Unilever擔任個人護理用品總裁，有Turnaround Specialist嘅美譽。
戴孤劃：淨係聽個來頭，就知道係勁人！
沈繼司：照咁睇，佢應該係入去Tesco救亡，但點解走咗去玩自我引爆呢？
高 仁：It's a game of politics。
戴孤劃：你真係「打邊爐」（烚下烚下），呢個好明顯係政治遊戲啦，佢咁做既能夠清理上手CEO留落嚟嘅「蘇州屎」，順便可以清除埋前朝嘅內部勢力，以便確立自己嘅管理團隊。
沈繼司：嘩，乜咁似啲黨派權鬥。
高 仁：Dave Lewis話晒都叫做Turnaround Specialist，學戴Sir話齋，佢咁樣做不單可以幫自己明哲保身，先行替Tesco嚟一個financial bath做低個基數，等到有機會時咪可以嚟一個大翻身，成功邀功。
戴孤劃：仲有，上市公司通常都會派啲options畀高層，業績轉好股價飛升，高層啲options咪袋袋平安囉。佢呢招真係進可攻，退可守。
沈繼司：Dave Lewis咪必賺無疑？
高 仁：咁都要睇返佢個人能力，係咪真係可以做到turnaround嘅。
戴孤劃：無論如何，呢單嘢嘅大贏家一定係法律顧問，你哋都知道佢哋收費幾嗱脷，話唔定隨時每個鐘1000英鎊起跳。
高 仁：最尾，我要提醒大家一點，Tesco呢單嘢未必一定涉及欺騙行為，可能只係用咗aggressive accounting（進取會計）或creative accounting（創意會計），去扭曲公司業績表現咋。
沈繼司：明白。伙記，嚟多隻燒鵝左肶。
本欄逢周一刊出
歡迎交流上市公司的財技個案及招數，請電郵至[email protected]。
放大圖片 / 顯示原圖
訂戶登入
| 下一篇： | 從雅居樂看內地民企原罪 |
| 上一篇： | 美滙強勢的矛盾 |
