《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2014年10月6日
各位「巴打」與「絲打」可能以為，會計財技是內地民企的「專利」，但原來華潤創業（00291）的內地超市合營夥伴──英國最大型零售連鎖企業Tesco都「不甘後人」，涉嫌造數誇大2.5億英鎊（約31億港元）盈利。
高仁趁與一眾「豬朋狗友」飯局，決定拆解Tesco誇大盈利所用的財技。
在披露對話實錄之前，請各位「巴打」與「絲打」看看人物背景，簡介如下：
戴孤劃—又稱為「戴Sir」，《信報》「蠱壇辨虛實」專欄作家，上市公司大股東，經常欺壓小股東。
沈繼司—核數師，熟悉會計制度、對數字敏感，但對外面世界一無所知。
沈繼司：高仁，你最近有冇留意新聞呀？
高 仁：近排咁多爆炸性嘅news，你講緊邊單先？Umbrella Revolution？
沈繼司：唔係呀，我講緊外國嘅財經新聞。
高 仁：Mmm……你做audit嘅，我估你想講Tesco涉嫌造數單嘢。
沈繼司：Bingo。我真係發夢都估唔到，連外國大型企業都造數囉。
戴孤劃：（帶不屑的語氣）你估淨係民企先識造數咩！
高 仁：（企圖紓緩緊張局面）要怪只怪我哋嘅沈繼司太年輕啫。
沈繼司：（立刻和應）戴Sir有怪莫怪，我後生仔唔識世界。
戴孤劃：（突然轉channel用普通話回答；高仁按：戴sir又賣廣告）沒問題，我這個人很「大氣」，「鐵哥們」，乾杯！
沈繼司：（普「東」話＝普通話＋廣東話）乾杯！
高 仁：乾杯！
戴孤劃：你哋不如講吓Tesco單嘢搞邊科先。
沈繼司：Tesco涉嫌一邊把收入提早入賬，另一邊又把成本延遲入賬，一來一回之下，估計誇大左2.5億英鎊盈利。
戴孤劃：嘩，咁狼死！？
由供應商回佣引起
沈繼司：報紙嘅消息話，Tesco涉嫌造假數，可能係由供應商贊助推廣活動提供嘅回佣引起，但我就唔知道箇中竅門係點。
高 仁：一般顧客可能唔知道，在超市內售賣產品「買一送一」之類嘅一次性promotion，可能大部分都係由供應商畀錢贊助去做，目的係將產品放喺較顯眼嘅位置。
戴孤劃：係咪好似「來得好」（Well-come，即惠康）同「泊住買」（Park-n-Shop，即百佳）嘅上架費咁？
高 仁：差唔多，但Tesco入賬手法同時間卻值得商榷。
沈繼司：根據國際會計matching準則，收入應該同所產生費用在時間上互相匹配喎。
高 仁：問題就係，Tesco幫供應商做產品promotion期間，即使產品仲未錄得銷售收入，Tesco可能已經參考產品嘅過往銷售成績，而將供應商嘅部分回佣提早入賬。
戴孤劃：咁都得？！點做法？
高 仁：例如，Tesco喺10月幫供應商做一個產品promotion program，對方願意支付1000萬英鎊回佣，估計Tesco可以把回佣分為兩部分，第一部分係一次性set-up收入200萬英鎊，第二部分係每月兩次嘅廣告推廣收入，合共800萬英鎊。
沈繼司：照道理，Tesco年尾埋單計數，就可以book到520萬英鎊收入（200萬英鎊 + 4 x 80萬英鎊）。
戴孤劃：有冇錯呀，高仁？
沈繼司：戴Sir，我計數，你放心。
業績未達標增誘因
高 仁：好，沈繼司等我畀多條數你計。假設Tesco把一次性set-up收入改為500萬英鎊，每月兩次嘅廣告推廣收入改為500萬英鎊，你睇下情況會係點。
沈繼司：一次性set-up收入500萬英鎊，再加每月兩次嘅廣告推廣收入200萬英鎊（4 x 50萬英鎊），即係總收入有700萬英鎊。嘩！比之前大幅增加35%喎！
戴孤劃：咁即係話，Tesco如果 misses profit target嘅話，管理層就可能有好大誘因將收入提早入賬。
高 仁：點止收入，我估計成本一樣可以造數，爭在你識唔識啫。
沈繼司：高仁，快啲講嚟聽吓。
戴孤劃：喂喂喂，高仁都講到口乾啦，等佢「飲啖茶、食個包」，之後先再講啦。
沈繼司：好，高仁請你食隻燒鵝左髀。
高 仁：嘩，沈繼司你真客氣。
（飯局未完，下周續）
本欄逢周一刊出
歡迎交流上市公司的財技個案及招數，請電郵至[email protected]。
放大圖片 / 顯示原圖
訂戶登入
| 下一篇： | Tesco風波反映歐超市難樂觀 |
| 上一篇： | 美滙倘跌破85.5 美元勢現較長調整 |
