戳破大「蠱」東「鷓鴣批」財技

各位「巴打」早前已了解到，一名大股東抵押旗下上市子公司股份融資，股份卻無故被沒收兼強制出售的離奇事件，有可能涉及早年盛行的猶太沽空基金蠱惑偷跳行動。

「高仁指點」話你知，出蠱惑並沒有界限之分，大股東也可以行蠱惑，本文將戳破大「蠱」東（蠱惑的大股東是也）的「鷓鴣批」財技。

戴孤劃：（用普「東」話，即普通話＋廣東話）高仁，你說什麼大股東的「鷓鴣批」？你唔講財技轉行教煮餸嗎？哈哈！

高　仁：非也，非也。呢個係近期比較流行嘅大「蠱」東財技套路，包含借貨、沽貨、批股的3種手段，所以呢套財技被命名為「鷓鴣批」（借、沽、批）。

程更計：高仁，我知道「借」同「沽」嘅意思，「借」係大「蠱」東先借貨畀友好人士，如果街貨夠乾身，股價會比較容易挾上去，友好人士就可以在高位沽貨（出售股票），「沽」也。

市況不就可高賣低買

戴孤劃：換言之，大「蠱」東是透過友好人士幫忙，把股份在高位散貨獲利吧！

高　仁：其實，萬變不離其宗，大股東高位沽貨是常識吧！

戴孤劃：如果市況不好，股份炒不上去，大股東會怎麼辦呢？

程更計：哦！如果股票市場氣氛疲弱，股份又有大量「空軍」壓境，機構投資者同散戶見到盤路唔對路，股價自然好快掉頭跌返落嚟。不過，唔使驚，有高仁喺大廳。哈哈！

高　仁：多謝阿程抬舉。呢個情況下，大「蠱」東會識得「執生」隨機應變，公司可以在低位批一手貨畀友好人士，即刻變成高賣低買亦得。得咗！一樣可以賺大錢。

戴孤劃：（再用普「東」話）大股東果然好蠱惑呀！

程更計：我做證券經紀經常四出同行家收風，獲得行業「巴打」告知小道消息，有「空軍」曾經想打某一隻民企股主意，「息」誘大股東或友好人士借貨畀佢沽空，大「蠱」東開心到不得了。

高　仁：嘩！「空軍」想借貨沽空隻股票，大「蠱」東又會咁開心，戴Sir知唔知點解呢？

戴孤劃：不知道啊！為什麼？快說吧！

程更計：戴Sir，煮餸都要時間，唔可以太心急。

高　仁：係啦，係啦！大家都講到口乾，不如飲杯茶、食個包，過一陣先再講啦。

本欄逢周一刊出

如想與高仁交流上市公司的財技個案及招數，請電郵至 [email protected] 。

下一篇：	恒指技術反彈宜守100天線
上一篇：	A股紅盤在望後市仍需審慎

文章：