熱門:

2020年7月13日

高仁 財圈識真假

踢爆啤殼上市七宗罪

高仁與「豬朋狗友」上文談到,今年上半年本港IPO市場表現出色,上市集資額打入全球三甲,惟過去申請上市被拒絕的個案也不少,揭露了當中六大死因。各位「巴打」,港交所(00388)對IPO未上市先判「死刑」,不排除是懷疑企業「啤殼」上市,本文將會踢爆當中涉及的七宗罪。

高 仁: 各位「巴打」相信都知道,企業要申請喺本港IPO上市,絕對係一項花時間、花精力、花金錢嘅玩意,卻仍有咁多企業樂此不疲去做,到底係乜嘢原因呢?

施友化: 無他嘅,上市公司嘅殼有價有市,尤其係前幾年仲飆升到天咁高,主板殼股閒閒哋都可以賣到幾億元,自然會吸引到一批「有心」企業搞上市,但其實就係買賣殼股。

戴孤劃: 嗯!這不就是「啤殼」上市嗎?港交所不會不知道的吧?

高 仁: 港交所當然亦留意到呢個問題,企業「做殼」普遍都有相同嘅特徵,主要涉及七宗罪名。

戴孤劃:七宗罪!我有看過這齣電影。哈哈!

施友化: 第一、二個罪名係比較普遍。首先殼股總市值一般較低,相信係為咗方便搵買家,再進行買賣交收;其次,殼股僅勉強符合上市資格最低要求,更不排除係透過造數上市,先至達到收入、盈利等上市規定。

戴孤劃:企業造數也要花錢啊!

高 仁: 戴Sir,你講得冇錯。除咗可能要花錢造數之外,企業上市開支條數亦唔嘢少,例如律師、保薦人、財務顧問、包銷、印刷等。如果上市開支與集資所得款項不成比例,即係上市所得款項絕大部分用作支付上市開支,有可能係上市為名、啤殼為實。為第三宗罪!

戴孤劃: 企業也得要有業務才能上市吧!這方面會不會出現一些狀況,導致企業不能上市呢?

資產容易變現 啤殼嫌疑大

施友化: 如果企業純粹從事單一嘅貿易業務,而該項業務又高度依賴個別客戶,港交所會擔心有關業務有「打龍通」嘅可能性,故此亦會構成啤殼上市第四宗罪。

高 仁: 另外,若果企業屬於輕資產(asset-light)模式,有關資產絕大部分係流動資產,換言之,資產容易變現,唔排除可能係啤殼上市,則會構成第五宗罪。

戴孤劃: 至於企業與母公司的關係,又會不會影響到上市申請呢?

施友化: 如果企業與母公司的業務劃分流於表面,例如只係按地區、產品組合或不同開發階段等刻意地作區分,顯示兩者業務有可能係密不可分,令人懷疑會否出現左手交右手,以協助企業谷大條數上市。呢一個就成為啤殼上市嘅第六宗罪。

高 仁: 最後一宗罪係,企業喺申請上市之前幾乎冇或完全冇外來資金,即係到申請上市嘅時候先至需要錢,令人懷疑其有冇上市集資的真正需要。

戴孤劃: 聽罷「啤殼」上市的七宗罪,咱今天又長了財技知識。哈哈!

IPO系列.之二

本欄逢周一刊出

如想與高仁交流上市公司的財技個案及招數,請電郵至 [email protected]

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads