不說不知的PE運作方式

各位「巴打」，PE（Private Equity，私募基金）行事一向較為低調，且其架構、運作、投資等各方式亦有別於傳統基金，所以給予人一種神秘感。本文，高仁決定找來「行內人」本港私募基金GP的Ken陳（Ken陳人如其名，「驚青」），一起分享不說不知的PE運作方式。

高　仁：阿Ken，自從我喺《信報》寫專欄第一年一齊喺Kyoto Joe食過飯，我哋就足足有成8年冇見過面，你公司生意點呀？

Ken陳： OK呀！全球量化寬鬆令市場水浸，內地土豪有錢冇地方使，佢哋對PE接受程度大咗，我搵生意都變得容易咗。

高　仁： Very good！最近，我都寫咗有關於內地PE嘅嘢，但有部分「巴打」唔係好了解囉。

戴孤劃：（搶着回應）沒錯啊！陳總，你的同業久不久就來找我，但我不太清楚你們怎樣分門別類，你可以解說一下嗎？

Ken陳：戴總，沒問題。PE主要可以分為創業投資基金、併購投資基金、過橋基金等等，其中創業投資基金主要投資喺種子期、初創期、快速擴張期同成長初期嘅企業；併購投資基金投資喺擴展期企業同參與管理層收購；而過橋基金就投資喺過渡企業或上市前企業。

一般投資未上市私人公司

高　仁：阿Ken，等我都幫手講下PE嘅特點啦。PE主要係通過非公眾方式籌集資金，目標就係類似戴Sir咁有錢嘅個人，或者譬如係養老基金同保險公司等機構投資者。PE銷售同贖回係基金管理人私下與投資者協商進行。PE多數採取有限合夥制，貪佢投資管理效率較高。PE投資交易係以私人協商形式進行，基本上毋須對外披露交易細節。

Ken陳：除此之外，PE一般只會投資喺未上市嘅私人公司，絕少會投資喺上市公司。PE多數採取股權投資方式，例如普通股或者可轉讓優先股，以享有被投資企業喺決策管理上嘅表決權，所以甚少涉及債權投資。PE投資屬於中長期性質，一般可以長達3至5年，或者更耐嘅時間。而PE要退出投資有多種方法，包括企業上市、出售股權、M&A、企業管理層回購等等。

戴孤劃： PE除了找投資者出資之外，還會找其他單位幫忙嗎？

Ken陳：其實，PE產業鏈涉及好多不同機構或個人參與者，除咗機構投資者或個人出資者之外，仲有嗰的需要資金投入嘅企業、為企業提供融資服務嘅私募融資顧問、基金和基金管理公司，以及為基金管理公司提供服務嘅基金募集顧問。

戴孤劃：除PE外，我還聽過什麼VC，這是什麼呢？

高　仁：戴Sir，唔使咁心急住，不如我哋唞一唞、飲啖茶、食個包，一陣再慢慢傾。

私募基金系列．之一

本欄逢周一刊出

如想與高仁交流上市公司的財技個案及招數，請電郵至[email protected]。