熱門:

2019年11月25日

麥狄文 金融街密語

二手樓劈價具啟示

噚日舉行嘅區議會選舉,由投票站早上運作一刻開始,已見選民踴躍投票,而投票率亦遠超上屆,反映經過近半年嘅社會運動後,普羅大眾對社會狀況關心,有人希望透過投票,改變目前狀況,使議會有一番新景象;同時有人希望繼續支持原有議會,望議會配合政府,可盡快平息目前亂局。無論有乜諗法,選民投票都係想盡公民責任,用手上一票表達意見。

用實際行動「投票」

不過,早喺今次區選舉行前,唔少香港人早已用實際行動對政府或香港未來投咗一票,講緊係由於社會運動持續,而呢場運動由6月發展至今,着着實實反映出政府嘅無能,社會動盪不止,而唔少人對前景信心盡失,有見及此,就以移民表態,表示對政府不滿,對前景嘅憂慮。之前阿Man都提過,唯有移民顧問公司係呢幾個月業績逆市上升嘅行業。

只係移民嘅嘢,並唔係一時三刻即時辦妥,總要有好多前期工夫要準備,例如資金調配,手上物業要處理,唔係話個人走咗,離開香港咁簡單。其實本欄早喺9月2日已透露,唔少中產喺安排或考慮移民前,人未動,資金先調動,將存款從本地銀行轉移到離岸戶口,為香港不穩定嘅局勢先作避險準備。將資金調離香港,都係一種表態,對香港局勢投下不信任票,惟資金調配離岸與否,都較為簡單,始終打個電話,上網按個掣,又或者去銀行走一轉,資金已可以隨時調回香港,亦唔算係完全放棄香港。

相對調走資金,出售喺香港嘅物業,若連自住物業都出售,呢個舉動可以話有更大嘅決心要撤出香港,遠走他方。二手物業市場有買有賣好平常,但喺近呢一個月,即係《施政報告》放寬二手樓按揭保險新措施後,除咗初期見二手樓業主作短時間封盤加價後,但近呢一個月竟然見到唔少業主劈價交易,好似喺過去周末,就見到一個麗港城減價逾一成個案,而較早前同一屋苑亦出現特色戶削價16%交易,呢啲單位主要嘅買賣對象都係中產。

當然,樓宇買賣係雙向嘅,要雙方同意先可以成交,不過賣方肯劈價,唔多唔少反映賣方出貨較為心急。行到去賣樓呢一步,當然有遠走高飛嘅打算,換樓則作別論。

避催淚彈寧納空租

至於未有打算離開嘅香港人,亦受呢場運動影響要喺居住上作出改變,阿Man有位亦師亦友嘅前輩行家,最近就同阿Man講咗個唔知算唔算笑話嘅八卦料。話說前輩喺沙田區有間村屋作收租用途,其中一個單位上手租客,兩個月前基於香港局勢走人退租,單位放租近兩個月都乏人問津。但喺上星期獲經紀通知,有個同區租客,本來住市中心屋苑,因為近期家中新添小成員,而新手媽媽係醫生一名,深知催淚彈殘留物嘅影響,決定喺原有舊居尚未完成死約,都情願納空租而速速搬走。剛好前輩間村屋地理環境有優勢,幾面有高高嘅老樹作遮掩,即使空氣有催淚彈殘餘物飄至,門前大樹可起屏障作用,所以火速扑槌租咗。經驗豐富嘅地產經紀話,做咗N咁多年,係首次有客人因為避催淚彈而搬屋,確係一百歲唔死都有新聞。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads