熱門:

2019年11月25日

高仁 財圈識真假

中小「數佬」生存秘技

各位「巴打」應該都記得高仁講過,現代美容(00919)10多年前出售套票,客戶在到期前更改服務療程種類或將未使用療程轉讓,公司錯誤地把預付款項確認為收入成為糊塗賬,連累核數師「水記」早前要受罰。

又一筆糊塗賬

Big 4都出事,高仁尋找資料時再發現,另一名中小「數佬」(哈哈!核數師的俗稱)的被罰個案,但原因竟然是由其審核的上市公司財務報表,涉嫌計錯數!

當高仁與「豬朋狗友」談論此事之後,大家就開始嘗試去解構,在列強環伺下,究竟中小「數佬」有何生存秘技。

施友化:高仁,我都認同你嘅講法,公司員工可能錯誤處理把遞延收益變成為收益入賬,「水記」或許又疏忽冇對呢個變動作出核實,最終成為一筆糊塗賬。

高 仁:哈哈!我之後又搵到一個糊塗賬嘅case,不排除又係差不多嘅情況。

沈繼司:Oops……又關我哋auditor事,快啲講嚟聽吓。

高 仁:呢個case唔關Big 4事,涉事嘅「數佬」係中小型行嚟嘅。

施友化:啊!我知道嘞。香港會計師公會(HKICPA)就誠豐會計師事務所及旗下一名執業會計師沒有或忽略遵守、維持或以其他方式應用公會頒布嘅專業準則,2018年8月對佢哋作出監管行動。

沈繼司:咁係咩嘢原因?

犯低級錯誤

高 仁:因為誠豐對藍鼎國際(00582)2015年度財務報表發表咗clean(無保留)嘅核數師意見,而誠豐一名執業董事係負責呢個審計項目,但該份經審計財務報表所披露嘅每股基本同攤薄虧損都有誤,原因係計算已發行普通股嘅加權平均數時涉及一項算式錯誤。

沈繼司:唉……不論公司抑或「數佬」,每股基本同攤薄虧損都計得錯,可以算係犯咗低級錯誤。

施友化:所以HKICPA咪決定對誠豐同嗰名執業會計師作出譴責同罰款囉!

高 仁:講開又講,呢啲中小「數佬」接job真係有一手,根據市場資料顯示,誠豐從2010年成立,至今約9年,香港員工人數不超過10名,但手頭上都有7個上市公司客戶。勁唔勁?

沈繼司:就藍鼎呢個客戶,誠豐原來喺2012年2月至2016年6月期間擔任過核數師,「水記」一度接手,但2018年12月就辭任,之後誠豐再度獲委任為核數師至今。原來係翻兜嘅。

施友化:我見到誠豐最近又接咗GEM客戶嘅job,主要係另一間Big 4會計師行請辭,再由誠豐填補呢個核數師嘅空缺。

漏夜趕科場

高 仁:我好耐之前都講過,如果核數師覺得上市公司可能有問題,可以大幅加價「請走」客戶,即使最後不成功,核數師也將可收取巨額酬金。

沈繼司:冇錯。所以,好多上市公司發布更換核數師嘅通告,原因都不外乎係公司與核數師未能就年度嘅審核費用達成一致。當Big 4辭官歸故里之後,中小「數佬」咪漏夜趕科場,就係以便宜取勝囉。

施友化:核數師請辭嘅其他因素,還可以包括考慮審計相關嘅專業風險、可動用內部資源等等……

肯配合上市公司

高 仁:因為Big 4較着重reputation同風險,如果認為審計嘅專業風險太高或要用太多資源去fact check,都寧願辭任早走早着;相反,中小「數佬」人力物力雖小,卻可能較願意配合上市公司嘅要求,所以可以爭取到一批客戶。

沈繼司:所以難怪會計行業喺Big 4壟斷之下,中小「數佬」都依然搵到生存空間。

本欄逢周一刊出

如想與高仁交流上市公司的財技個案及招數,請電郵至 [email protected]

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads