2019年11月15日
11月14日,周四。有套美劇,劇中男主角醉心電腦科技,但一直無法在行內大展拳腳,後來連份工都冇埋,未來外父搞石油,提議男主角不如過去幫手,但電腦迷卻用digging the past來形容石油業,缺乏創意,缺乏未來。畀佢講中晒,過去五年,石油股表現,差到痹,難怪先前石油大佬埃克森都要跌出美股市值十大。
科技股自然大有投資價值,不過並非只有科技才有未來。另外有種油,同屬生活必需品,前景比石油好得多,未必輸蝕得過高科技,乜油咁巴閉?答案係醬油。
佛山豈止功夫高
中港兩地,分別都有間醬油老字號,相當出名。香港李錦記有錢到可以去英國大掃地產物業,公司有幾好搵,大家應該心中有數。中國醬油一哥,非海天味業莫屬。美國調味料巨頭味好美(McCormick)靠自然增長及併購,長年利潤持續增長,市值超過200億美元,已經算犀利。但同海天3000億元人民幣(約428億美元)市值一比,當堂差幾皮。
先前媒體大字標題報道,海天市值超越萬科,賣醬油好過賣樓。其實論利潤,海天仍舊低一截,海天一年賺四五十億元人民幣,萬科上半年已經賺118億。但市場喜歡海天,願意付出幾十倍PE,相比萬科,估值8倍幾,差得遠,所以市值計,地產大佬萬科都要輸個馬鼻。
海天來自佛山。當地熱門財經新聞,多數關於佛山雙雄,美的以及碧桂園(02007),或者其他支柱行業,例如汽車製造發展情況,以及佛山近年如何投入氫能等新科技。醬油行業,太過普通,相對比較少人留意。其實今年胡潤富豪榜,佛山有36個人上榜,美的老細何享健父子,碧桂園楊慧妍等當然有份,而海天老細龐康亦好掂,財富大漲六成,位列23。
多數人只知道佛山出名功夫勁,出過葉問等武林高手。原來佛山醬油都大有歷史。話說三百年前乾隆年代,佛山就出現一批醬園。之所以能夠成行成市,原來晾曬屬於釀造醬油最關鍵一步,佛山日照時間一年多達300多日,得天獨厚。批老舖當中有二十多間後來經過合併,改制,誕生出海天。
有金漆招牌,有傳統秘方,都需要懂得發揚光大。歸功龐康,九十年代開始大力引入先進設備,後來又夠膽大力擴充產能,上市資金主要用途正正就是興建一個巨型生產基地。做消費品生意,消費者能否容易買得到,決定成敗,海天好似可樂與康師傅(00322)一樣,深明掌控渠道重要性,晨早建立起全國網絡。企業增長101,第一招就是量產量銷,規模效應,海天成功做到。之後,連隨出第二招,增加產品種類,例如蠔油,其他調味料等等,今日都已經成為主打產品。
善用科技更上層樓
海天雖然「老」,但心唔老,非常善於利用新科技。咪以為醬油好落後,要保證衞生安全,需要殺菌技術,需要控制廠內空氣微粒量,標準同藥廠有得揮,生產亦盡量自動化。近年好多企業都想辦法利用物聯網,海天幾年前已經開始實行,通過數據,追蹤每件產品,以便追尋問題根源,預警設備檢修需要,令質素以及效率更高。
海天從豉油蠔油到雞精雞粉以至醬菜都做,產品屬於生活基本所需,幾乎個個家庭都要用。而且recurring,用完又要買。加上市場集中度不斷提高,對大品牌特別着數。開發新產品空間亦頗大。作為傳統行業,毋懼科技顛覆,相反,科技可以提高生產效率以及增加更多銷售渠道。各方面business economics都相當唔錯。
石油業,又要靠經濟好,又要擔心被新能源替代,又要顧慮地緣政治風險,業績波動大。高科技,你聰明人家一樣聰明,突然冒出個新科技,就可以踢走你。相比下,醬油事業,有發展空間,又相對安穩,難怪得到市場歡心。
五年回報五倍
海天2014年2月上市,首日即升三成,收市價大概18元,目前股價113元,五年回報五倍。同一日,如果用90元捧埃克森場,淨計股價蝕兩成。如果當日用7.8元買中石油(00857),唔計股息,幾乎唔見一半。
海天去年賺43億元人民幣,增長兩成。各項指標健康。生意額升17%,ROE 32%,利潤率25%。今年上半年收入與利潤維持增速。可惜海天這類內地品牌,老畢幾年前聽都未聽過,一路顧住關注批大公司,根本唔知龐康係邊個。海天已經炒到飛起,假設全年每股賺2元人民幣,目前PE超過50倍,都唔知追好唔追好。
(編者按:畢老林最新著作《我的投資日記》現已發售)
歡迎訂購:實體書、電子書
放大圖片 / 顯示原圖
訂戶登入
下一篇: | 康德萊跑贏同儕 估值貴耐心候低吸 |
上一篇: | 香港股市上日收市統計 |