熱門:

2019年11月4日

麥狄文 金融街密語

關公災難突顯公關重要性

香港第三季本地生產總值(GDP)按年實質下跌2.9%,實質GDP繼次季按季下跌0.5%後,喺第三季嘅跌幅擴大至3.2%,反映香港經濟已步入技術性衰退。呢個走晒樣嘅GDP,無可否認係同已持續接近5個月嘅社會運動有關,當中最受影響嘅當然係零售業,而零售業不濟,除咗因為本地消費情緒減弱外,訪港遊客數字急降,亦嚴重打擊零售業。阿Man之前亦有提到,由於社會動盪,金融圈嘅deal flow亦幾乎停頓,幸而喺10月份嘅IPO又好似有番啲起色。連阿里巴巴回流港股都話咁快有眉目,唔知係金融業對社會運動逐漸麻木,日子仍要過,開始都要追番上季少做嘅生意,定係中美貿易協議漸見曙光,而恒指實際上喺呢段時間又未見大冧檔,所以企業融資活動又再活躍番。

除咗金融業未死得,唔少行業簡直係今次社會運動嘅贏家,由於多咗中產再生移民念頭,移民顧問公司呢期生意好到不得了。就算人唔走,諗住錢先走,開設離岸銀行戶口數目急升,亦令個別專幫人搞資產移去外國嘅顧問公司其門如市。

另一個呢期炙手可熱嘅行業就係公關啦,喺呢段時間公關公司更突顯其重要性。阿Man就知道唔少公關公司,尤其係服侍幾個大地主嗰啲公關公司,呢段時間更加係豬籠入水。

好似政府喺9月初,一度接觸幾間國際公關公司徵求意見,希望有公關公司協助重啟宣傳工作,可惜8間全球公關公司無一間肯接呢個job。呢幾個月無論行政長官或司長嘅民望直線向下,市民對政府嘅信任度前所未有咁低,期間所發生嘅公關災難多如恒河沙數,阿Man都不在此再作詳列,但就見得到公關其實係相當重要。

請外援應對「鬥地主」文化

至於幾個大地主呢期點解特別需要公關,乜大企業唔係一向有自己公關團隊咩?咁呢樣就要多得政府嘅新房屋政策,當中建議考慮引用《收回土地條例》以增加土地供應增加建屋數目,以解決長期嘅居住問題。不過,喺香港呢個自由經濟體系,引用《收回土地條例》係咪恰當,社會上有唔同聲音。其中一個討論係關於「鬥地主」文化可能喺香港崛起,由於阿Man唔係呢個議題嘅專家,而坊間唔少「鬥地主」議題嘅KOL,呢樣嘢就留番畀相關KOL去討論分析。

不過,正因為呢個議題,香港嘅大地主基於身份尷尬,實在不宜發聲,所以呢期就搵外援公關,密集式咁做訪問、出調查,搵學者權威討論,總之係希望「鬥地主」文化千祈咪喺香港發揚光大。除咗地主佬,好多較為有名嘅企業,尤其係涉及到大眾日常消費嘅,管理層一個唔生性衰多口,搞出關公災難一樣要搵公關執手尾。咁當然啦,發生咗關公災難,可以視而不見唔處理,只不過家下興起一種文化,就係以政見去決定消費,建立顏色經濟圈,抵得起被消費者杯葛嘅,又覺得公司形象係點無所謂嘅,咪由得佢囉……反正香港人有一個特點,就係善忘。

麥狄文(徐狄怡.證監會持牌人)

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads