熱門:

2019年10月28日

麥狄文 金融街密語

北水開閘買W股 小米難靠此翻身

上交所及深交所喺10月18日發出公告,明確列明喺香港上市嘅同股不同權公司(WVR)正式納入「港股通」,仲會喺28日實施,即係今日開始內地資金可以透過「港股通」,盡情大大力掃小米(01810)同埋美團點評(03690)股份。

其實,今年4月,港交所(00388)已跟中證監講數,要把WVR納入「港股通」,市場當時並未有太大反應,小米股價更加係每況愈下,喺9月初更見過上市後低位8.28元,直至18日公告發出後,小米先叫做有啲反應,但早兩日都只不過由8.5元水平抽到上9元附近咁大把,1元進賬亦唔到。

表現不及美團

至於美團股價就有啲先知先覺,早喺8月已開始發力,由60元水平勁升超過五成至日前高見97.4元,距紅底股僅一步之距。

內地交易所肯為WVR股開啟北水閘,消息似乎暫時只能令美團錦上添花,未能為持續疲弱嘅小米雪中送炭,皆因小米現價較其上市發行價17元,仍有大大段漫漫長路。至於話要見番掛牌後高位22.2元,股價更要唔止翻一番,睇怕大媽就算熱情有加,小米短期要「返家鄉」仍有甚高難度。

雷軍豪言暫落空

先睇小米本身嘅業績,8月中公布,第二季利潤按年增加74%,超出晒市場預期,睇落係好勁,只不過魔鬼永遠在細節,再睇營業額比上一季放緩,三大業務包括手機、互聯網服務及IoT全部倒退,前景當然令人擔心。尤其係全球手機銷量放慢,小米應對方法係轉型互聯網服務及IoT,可惜龜速進度跟盈利表現,一直未得到市場認同,呢個亦係小米嘅致命傷。

另一個小米為市場所棄嘅原因,就係作為一隻WVR,投資者對主要股東及管理層大大小小動作都會特別敏感,偏偏公司舵手雷軍嘅舉動就甚具話題性,但係掛牌當日一句豪言「要讓在上市首日買入小米公司股票的投資人賺一倍」,至今阿Man仍然記得一清二楚。

今日再睇番呢句話,小米以現價計要升4倍到36元,以上市價入小米嘅股東就賺一倍!

仲有今年初,集團向雷軍一次過發行6366萬股B股,雖然相關股份未有售出,而雷軍亦自願加長所有持股嘅禁售期。重點係呢批屬於獎勵股份,扣除稅項之後,只能全數捐贈用於公益用途。

一向公司以股份替代薪金,並將公司成績跟薪金掛鈎,理論上係可以形成循環激勵機制。只不過小米嘅情況係呢啲「獎勵」永遠都唔屬於雷軍,只能全數捐出去,咁即係話錢永遠唔會落到雷軍袋口,咁佢又點會着緊呢批股份嘅價值。對其他股東嚟講,雷軍持股嘅禁售期長短,根本係毫無意義。

集資額半數回購

即使公司自今年初開始啟動回購,至今回購累計已用咗超過11億元,而上月初集團更表示將回購金額增至最多120億元,相等於小米去年IPO集資額244億元嘅一半,喺市場抽咗嘅水,竟然要嘔番一半出嚟。公司咁大手筆進行回購,咁當初上市集資嘅初心又去咗邊?換句話講,公司其實係無投資需要,無投資就無新發展,無新發展即係無前景,一間無前景嘅公司,單靠回購亦難撐股價。

除非大媽由今日起盲撐小米,將所有街貨掃得一乾二淨,令貨源歸邊,否則就算北水開閘,小米亦難起死回生。

麥狄文(徐狄怡.證監會持牌人)

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads